SCC pali atang chauhin Sawhthing lei ala ni; Budget-ah cheng vbc. 150 dah tum a ni

Agriculture Department changtu Minister PC. Vanlalruata'n tun thla February ni 2 atangin sawrkarin Sawhthing lei tan tum mah se tun dinhmunah Secondary Collection Centre (SCC) 64 zinga 4 atang chauhin lei a la nih thu House a hrilh.

Nimin-a Assembly thutkhawma Lawngtlai West Bialtu MLA C. Ngunlianchunga zawhnaa chhannaah he thu hi sawiin Agriculture Minister PC. Vanlalruata chuan Sawhthing lei tia sawi chu sawrkarin loneitute hnen atanga lei ni lovin, Support Price a pe tihna ni tih a sawi a, hetihlai hian nikumah Sawhthing rate a chhiat em avangin sawrkar chuan loneitute chu lei sakin Sairang-a Buffer Stock-ah a dah sak a, sum senso a san avangin kumin ah sawrkarin a tlin tawh lo tih sawiin, Siliguri leh Delhi Mandi rate milin District tinah Sawhthing rate tur Floor Price siamin, kg-ah cheng 40 atanga cheng 45 inkar Floor Price an siam tih a sawi a, Sawhthing leitu tur ten an dawn ve reng avangin kg-ah cheng 30 atanga cheng 35 ah an tihniam a, tun dinhmunah Secondary Collection Centre (SCC) 64 zinga 4- Khuangleng SCC, Cherhlun SCC, West Phaileng SCC leh Tuipang SCC-ah te sawrkar Floor Price angin Sawhthing hralh mek tih a sawi a ni.

Agriculture Minister chuan Mizoram Sawhthing chu tha bikin, Chemical tel mang lo, Organic tluk a nih avangin mi in an duh bik hle tih a sawi a, Chief Minister Lalduhoma hovin NITI Aayog hotute nen Mizoram tharchhuah Sawhthing sawiho a ni tawh a, Mizoram Sawhthing tharchhuah quality tha tak chu ramchhung mai ni lovin khawvelin a hre chho mek tih sawiin, Sawhthing chu man tlawma hralh phal lo turin loneitute pawh an zirtir mek tih a sawi bawk.

Zawh belhna chhangin Agriculture Minister chuan Sawhthing-ah 3rd Party an inrawlh reng tih sawiin, tun dinhmunah Burma Sawhthing lo lut mek a awm niin a sawi a, hemi venpui tur hian Home Department hnenah ngenna an thlen tawh tih pawh sawiin, ram thenawm Bangladesh chu Sawhthing lei nasa tak ni thin mah se, an ram a buai tak avang leh kawng that loh avangin kumin ah chuan Bangladesh lamah Sawhthing hralhchhuah tum a nih loh thu a sawi a. Hei bakah hian kum 2026-2027 chhung hian Sawrkar chuan thlai thlanchhuah bik Sawhthing, Hmarcha, Hmunphiah ro, Aieng leh Buhhum leina turin ruahmanna a siam thu leh hemi chhung atan hian Agriculture Department hnuaiah cheng vbc. 150 dah tum a nih thu a sawi bawk.