Surveyor lak thar te an hnaa rinawm turin chah

Land Revenue & Settlement Minister B. Lalchhanzova chuan LR&S Department-a Surveyor 14 lak tharte chu an hna a rinawm turin a chah.

Nimin khan Directorate of Land Revenue & Settlement-ah LR&S Department in Surveyor 14 a lak tharte chu Minister hian kawmin Revenue Department chu Department tawp, eirukna leh hlemhletna tamna leh a thawktute pawh dawr harsa tak anga hriat an ni thin tih sawiin, “Hei hi thlak tumin hotu lian ber atanga District Office zawng zawngah te tan lain kan insiamtha mek a ni,” a ti a. Revenue Department mipuiin an thlir dan tam zawk chu mipui nena indawr hnai ber Surveyor te kutah a awm tih sawiin, “kan insiamthat kawngah hian a hmahruaitu ni turin kan Surveyor thar te hi kan beisei che u a, in lakah kan thikthu pawh a chhe dawn hle a ni,” tiin hnuhma tha hnutchhiah turin a chah a ni.

Revenue Minister chuan Surveyor indaihlohna hriain Chief Minister in mi thar 14 lakna tur a phal sak chu lawmawm a tih thu sawiin, MPSC lamin felfai leh rang takin hma an laknaah lawmthu a sawi a. Recruitment Rules chungchanga Court kal an awm avanga Surveyor tling tharte appointment an pek mai theih loh dan te leh chu buaina chinfel a nih ruala District hrang hranga Post tura Surveyorte’n Training an zo thei chu lawmawm a tih thu a sawi a. Surveyor dang 30 lakna tur exam pawh zawhfel a ni leh tawh thu leh MPSC pawhin result rang takin peih sak vat thei se a lawmawm tur thu a sawi bawk.