Chief Minister in tha taka sawitlan-a tihtawp a duh

Chief Minister Lalduhoma’n tunhnaia Assembly Petition Commission thutlukna Speaker hnena thehluh a leak out chungchangah a thehluttu Member chu Committee on Privileges hmaa din tir a duhsak lo tih sawiin, Speaker nena tha taka an sawi tlang thei a nih chuan tihtawp tha a tih thu a sawi.

    Nimin-a Assembly Session-ah House Leader Lalduhoma chuan tunhnaia Petition Commission thutlukna Speaker hnena thehluh leak out chungchang sawiin, hetiang hi an la hriat ngai loh thil a nih thu a sawi a, “Assembly hnuaiah Committee hrang hrang a awm a, House-a a copy an pharh hma chuan Confidential a ni a, sawi chhuah awih a ni lo,” a ti a, hei chen Assembly neih a nih chhungin member ten Committee thuruk an sawichhuah an la hre ngai lo tih sawiin, chanchinbu-ah vawrh darh a ni chu pawi an tih thu a sawi a, “Tha taka thehluh chu engmah pawi a awm lova, Press Conference ang hial kova chanchinbu-ah a chhung thu sawi zui a, action an la dawn tih sawi chu a vawikhatna thlenna a ni,” a ti a, Privilege Committee hmaa din tir than a nih avangin a hrehawm zia a hria a, a thehluttu Member chu Privilege Committee hmaa din tir a duhsak lova, Speaker nena tha taka an sawi tlang thei a nih chuan tihtawp tha a tih thu sawiin, tha taka an sawi tlang thei lo a nih chuan Privilege Committee-ah a kal zel a ngai mai thei tih a sawi bawk.