MUHCS hnuaiah Empanelled Hospital ni lova damlo enkawlna senso vbc. 25 pekchhuah a ni tawh

Mizoram Universal Health Care Scheme hnuaia Empanelled Hospital ni lova damlo te inenkawlna senso Rs. 27,45,81,659 chu pekchhuah a ni tawh a. February ni 3, 2026 thlenga sum bat la awm cheng vbc. 25 chuang pawh sawrkar kum kal mek chhungin pek tlak vek tum a ni bawk.
Thuthar thehdarhtute zawhna chhangin Mizoram Health Care Society-a hotute chuan Mizoram Universal Health Care Society (MUCHS) hnuaia Empanelled Hospital ni lova damlo inenkawlna senso an pekchhuah tawh chu a vaiin Rs. 27,45,81,659/- a nih thu sawiin, heng te hi Mizoram chhunga damlo 3,381 enkawlna senso Rs. 15,06,58,909/- bakah Mizoram pawn-a damlo 1,595 inenkawlna senso Rs. 12,39,22,750/- te a ni tih an sawi a. Mizoram Health Care Society hotute chuan MUHCS hnuaia Empanelled Hospital ni lova damlo enkawlna senso an pek hi Mizoram sawrkar in rikrum thil leh nunna chhanna atana Non-Empanelled Hospital-a inenkawl theihna dan a ruahman hmanga pek a nih thu sawiin, hetiang hmanga damlo enkawlte chuan Mizoram State Health Care Society-a an inenkawlna senso an bill dawnin an inenkawlna Private Hospital atanga Emergency Certificate an neih ngei a tul thung tih an sawi a. Mizoram pawn-a Non-Empanelled Hospital-a inenkawlna senso erawh chu MUHCS awm hmaa damlo ten an lo pan laklawh tawha kal nawn leh ngai ang chi a ni tlangpui tih an sawi bawk.

Empanelled Hospital ni lova damlo inenkawlna senso pekchhuah hi Mizoram chhunga Private Hospital 11-a damlo inenkawlna leh Mizoram pawn Hospital 59-a damlo inenkawlna a ni tih Health Minister Lalrinpuii chuan Assembly Session neih mekah INC Member C. Ngunlianchhunga zawhna ziaka a channa ah a sawi bakah MNF Member Ramthanmawia zawhna pawh chhangin Empanelled Hospital ni lova damlo enkawlna senso hi February 3 thleng khan Rs. 25,11,52,017 bat a la awm tih a sawi a. Hei hi damlo 2837 inenkawlna senso a ni tih sawiin, Non-Empanelled Hospital-a damlo inenkawl senso hi Manual-a dawn a nih avangin a buaipui chhung a rei deuh thu leh chak taka bawhzuiin sawrkar kum kal mek chhunga pek tlak vek tum a nih thu leh sum a awm sa vek thu a sawi bawk.