Ruihhlo ngai pual Camping-a lut eizawnna bultanna nei lo te sawrkar in a tanpui dawn

Chief Minister Lalduhoma chuan Serchhip-a Ruihhlo pual-a Gospel Camping buatsaiha lut, eizawnna mumal nei leh bultanna nei lo te chu sawrkar in a tanpui dawn tih a sawi.
Serchhip District huapa Ruihhlo ngaite puala Gospel Camping buatsaih Follow-up Programme hnuhnung ber nizan-a Presbyterian New Serchhip Kohhran Biak In-a neih a hmanpuina ah Chief Minister Lalduhoma chuan he Camping-a lu te chu Camp atanga an chhuah hnuah In leh lo te dina chhungkua te din thei tura ngaihtuahna siam tura a duh thu a sawi a. Eizawnna lama an tih tur leh an tuina lam te Pathian hnenah tawngtaia dil tura chahin, sual-a an tluk leh tawh lohna tura tisa lama an kawng tur an lo zawnpui tur thu leh chutianga eizawnna mumal nei an awm phawt chuan bultanna an nei lo a nih pawhin sawrkar in bul a tanpui dawn thu leh an tan sawrkar in sum a ren dawn loh thu a sawi a. Camp-a lut tam tak te chu a hmaa lo lut tawh thin an ni tih Speaker te ngei pawhin an sawi thu Chief Minister chuan sawiin, “Khatianga suala kan tluk loh tawh lohna turin sawrkar nen kan tankawp a ngai a, Pathian in kan hausak te hi a phal a, Lei malsawmna min pek hi a duh a ni. Chumi kawng in zawhna ah chuan in tisa lam mamawh phuhru turin sawrkar pawh a inhuam a, a lo inkau reng a, duhsak bikna kan hlan dawn che u a ni,” a ti.

Chief Minister chuan Camp-a lut te chu thuawihna nei tura chahin, “In tui reng kher lovang, in rinna in a daih reng kher lo ang, mahse thu awih rawh u,” tiin Bible-ah thuawih ten malsawmna an dawn thin dan te a tarlang a. “In nu leh pa te thu te, in chhungte thu te, khawtlang hruaitute thu te, sawrkar thu te Kohhran ho thu te in awih phawt chuan in tlu tawh lovang. In awih loh ni ni kha in tluk leh hun tur a nih avangin Pathian in ‘thuawihna aiin ka duh zawk’ a ti a ni tih hre reng turin ka chah che u a ni,” a ti bawk.

Serchhip Bialtu MLA ni bawk Lalduhoma chuan Ruihhlo ngaite puala Gospel Camping thlengtu Kohhran te inpekna leh inbuatsaihna a ropui in a hlu nia a hriat thu sawiin, Serchhip DC leh a thawhpui te, sawrkar Department hrang hrangte thahnem ngai taka an che chu ropui a tih thu a sawi a. Kohhran hrang hrang ten an inkara daidana bang te tichima he rawngbawlna a an thawk tlang chu thil thleng zen zen lo a nih thu pawh sawiin, a ropuiin a chhinchhiah tlak tih a sawi a. Tlawmngai Pawl hrang hrangte nen Organising Committee kaihhruaina hnuaiah an tang tlang chu lawmawm a tih thu a sawi bawk.