Sialkal Range Development Council Bill, 2026 Select Committee-a siamthat turin pawm a ni

Mizoram Legislative Assembly thutkhawm ah Sialkal Range Development Council Bill, 2026 chu Select Committee-ah siamthat ngai te siamtha turin pass a ni.

Sialkal Range Development Council Bill, 2026 puluttu Chief Minister Lalduhoma chuan he Bill in a huamchhungah khaw 6 awmin khaw 4 chu Saitual District huamchhungah a awm a, a dang 2 chu Champhai District-ah a awm a, MLA bial pahnih ah a awm ve ve bawk avangin MLA Bial pakhat leh District pakhat hnuaiah awm thei se a duhawm hle tih a sawi a. He Bill-ah hian sawrkar hmasa in Draft a lo duan tawh chu ringin tlem an tidanglam tih sawiin, a danglam nasa ber tur chu khaw 6-a VC te member a rin nghal mai leh MLA Chairman a awm mai kha ni tawh lovin, Member paruk te chu mahni khua theuhah an thlang tawh dawn a, a voter te chu MLA inthlana voter te an ni dawn a, State Election Commission buaipuina hnuaiah an inthlang ang tih a sawi a. Elected Member 6 awmin, pakhat dang chu sawrkarin Nominated Member a siam ve thung dawn a ti a. Member thlanchhuahte chuan an zing atangin Chief Executive Member leh Executive Member tur pakhat ve ve an thlang anga, a dang 5 te chu Member an ni dawn a. Mimbung chu Official Headquarter tur niin BDO aia hniam lo Secretary-ah hman tur tih a ni bawk.

He Bill hi Member hrang hrangin an sawiho hnuah a puluttu Chief Minister Lalduhoma chuan Member ten thil fel lo lai ni-a an sawi te enfiaha siamthat ngaite siamtha turin Select Committee-ah refer turin rawtna a siam a, he rawtna hi House chuan lungrual takin a pawm a ni.

Nimin-a thutkhawm ah hian ‘The Mizoram Shops and Establishments (Regulation of Employment and Conditions of Service) (Amendment) Bill, 2026’ chu lungrual takin a pawm a bawk a. He Bill puluttu LESDE Minister Lalnghinglova Hmar chuan he Bill-in a tum ber chu hnathawktu leh a ruaitute tana awlsamna, a dan an zawm tikhirhtu sukiang tura tih a nih bakah Dan bawhchhetute hremna leh Dan bawhchhiatna hremna awlsam zawka kalpui dan leh tihchakna a nih thu a sawi a, he Bill-ah hian hna thawh hun chhung darkar 8 thleng tih thin chu darkar 10 thleng thawh phalna siamin, inhlawhfate chhawr rim lutuk an nih loh nan chawlhkar khata darkar 58 hnathawh phalsak thin chu darkar 50 thleng thawh phalsak a nih thu a sawi bawk a. House Member te chu he Bill hi pawmpui tura sawmin Member hrang hrangin an sawiho hnuah House chuan inlungrual takin a pawm a ni.