Chief Minister in ZPM mi leh sa ni lo tan pawh CM Special Package a dawn theih tih a sawi

Planning & Programme Implementation Department changtu Chief Minister Lalduhoma chuan ZPM mi leh sa ni lo tan pawh CM Special Package dawn theih a nih thu Assembly House hrilhin, kum 2024 – 2025 chhungin tanpuina dawng Progress Partner 2,255 an awm thu a sawi bawk.

Nimin-a Assembly thutkhawm ah MNF Member pathum Lalchhandama Ralte, Ramthanmawia leh Prova Chakma bakah BJP Member Dr. K. Beichhuate zawhna intawm chhangin Planning & Programme Implementation Department changtu Chief Minister Lalduhoma chuan CM Special Package Grant chu 'Guidelines for Handholding Support to Progress Partners Phase-II in a sawi angin sawrkarin a kalpui tih a sawi a, “Dilna hi India khua leh tui, Mizorama khawsa nghet, sawrkar hnathawk lai ni lo, mahni eizawnna kawnga ti tak takte tan a dil theih a ni,” a ti a. Eizawnna kawng zawh mek lai hlawhtlinpui tura ti tak tak mi, puih tlak ni a Implementing Department-in an ngaihten an dawng thei tih sawiin, “Chutiang mi, ZPM mi leh sa ni lo tan pawh guidelines-in a sawi angin CM Special Package hi dawn theih a ni,” a ti.

Chief Minister chuan CM Special Package hnuaia hmalakna sum progress partner-te hnena pekchhuah chu Department a zirin amount inang lo a awm tih pawh sawiin, Department thenkhatah cheng nuai khat a nih laiin thenkhatah chuan cheng nuai khat pha lo te pawh a awm tih a sawi a. “An Project activity a zirin Implementing Department-te'n hei hi an siam rem thin. Sum hi progress partner-te hnenah tum khatah a vaia pek an ni,” a ti bawk.

Kum 2024 - 2025 chhunga Mizoram Bana Kaih (Handholding) Scheme hnuaia CM Special Package dilna chu February12, 2026 thlengin 74,373 a lut tawh tih Chief Minister chuan sawi bawkin chuta tang chuan tanpuina dawng Progress Partner 2,255 an awm thu leh an zingah hian cheng nuai khat dawng chu 479 an nih thu a sawi a, District tina tanpuina dawngtu zat pawh a tarlang bawk a ni.