FSL mi thiamte pawikhawihna hmun 1,815-ah kal tawh

Forensic Science Laboratory (FSL) Mizoram-a mi thiamte chu kum 2000 atanga kumin (2026) January thla thlengin pawikhawihna hmun 1,815 ah kal tawhin, kum 2024-2025 chhung khan FSL mithiamte chuan tualthahna chungchang tum 20 an enfiah bawk a ni.

FSL in an chhinchhiah a tarlan a nih danin, kum 2000 atanga kumin January thla chhung khan pawikhawihna (crime scene) hmun 1,815-ah an kal tawh a, thubuai 16,509 enfiah zo tawhin Hnuchhuina kaihhnawih peng hrang hrang an hmuhchhuah zat chu 1,85,698 zet a ni a, pawikhawihna thubuai leh an endikna kaihhnawihah Court-ah vawi 5,015 an ding tawh bawk a ni.

Kum kal ta 2024-2025 chhung khan FSL mithiamte'n tualthahna thleng vawi 20 enfiah an nei a, mipat hmeichhiatna chungchanga pawikhawihna thleng vawi 18 an enfiah bawk a. Heng bakah hian pawikhawihna hrang hrang enfiah an nei bawk a ni.

Forensic Science Laboratory (FSL) hian Police ten an man pawikhawihtu hrang hrangte kutze thla (fingerprint) 5,982 an nei/kawl tha tawh a, FSL-in tun thlenga kutze thla an neihte hi pawikhawihtu convict (thiam loh chantir) tawh mi, 3,373-te kutze thla leh pawikhawihtu an man tawh mi 2,609-te kutze thla a ni. FSL-a thawktute hi pawikhawihna hmun hrang hrangah kal kualin, finfiahna awm thei angte an lakhawm thin a, pawikhawihtute manchhuahna kawngah Police kutke tangkai ber pakhat an ni.