Bill pass vangin lawmthu sawi

State University Demand Committee Lung-lei chuan Mizoram State University (Amendment) Bill 2026 pass anih theihna atana hmalatute chungah lawmthu an sawi.

Nimin-a thuchhuah an siamah State University Demand Committee Lunglei chuan February 25, 2026 a ‘The Mizoram State University (Amendment) Bill 2026’ pass a ni chu lawmawm an tih thu sawiin, he Bill pass a nih theihna atana hmalatu Chief Minister Lalduhoma, H&TE Minister Dr Vanlalthlana leh Lunglei MLA palite chungah lawmthu sawiin, Chhim lam mipuite hmasawnna tur ngaihtuah a ni chu thinlung takin lawmthu an sawi a. H&TE Minister Dr. Vanlal-thlana’n Cluster of Colleges zingah Mizoram Engineering College leh Lunglei Govt. College telh an nih tur thu a sawi chu lawmawm an tih rualin Lunglei-a College dang Govt. J.Buana College leh DIET Lunglei te chu ti changtlung a, a rang thei ang bera Cluster of Colleges zingah telh leh turin Mizoram Sawrkar an ngen a, a tawp thlengin uluk takin an vil zel dawn tih an sawi a ni.

State University din tur hi NEP (2020) thu a nih avang chauhin Mizoram Sawrkar chuan harsa tak chungin din a tum tih pawh sawiin, hetiang a nih laia State University Bill sawihonaah Leader of Oppossition Lalchhandama Ralte in Mizoram State University Headquarters Aizawla awm tura pass tawh kaltlangpui nise, State University dang, Lunglei-a Headquarters awm tur din ni bawk rawh se tih MNF MLA ten Resolution an thehluh vek thu a sawi chu State University Demand Committee Lunglei chuan pawi an tih thu sawiin, State University pakhat din pawh a harsat laia a theih dawn loh tih hre reng chunga State University pahnih neih/siam an rawt chu Chhim lam mipuite zahlohna leh Lunglei-a State University din tur sawihnawm tumnaah an ngaih thu an sawi a ni.