School chawlh hmang tangkai ila

Kum 2025-2026 Academic Session chu kan hmang zo dawn hnai ta a, zirna In hrang hrang ten Promotion Exam nei chho mekin Zirna In tam zawk chu tun thla chhung bak hawn a ni dawn rih lo a, March thla chhung zawng hian ‘Kum tawp chawlh’ kan tih thin ang hun kha hman a ni dawn a. Thla khat vel lai naupang ten School chawlh an hman dawn avang hian nu leh pa te pawhin he hun awl nia lang hi kan tu leh fa ten tangkai tak leh hlawk taka an hman dan tur kan ngaihtuahpui a tul hle mai a. Kawng tha lo zawhna hun remchang atana an hman lohna tur atan leh thil tha zirchhuahna hun remchang atana an hman zawk theihna tur kan ngaihtuahpui a tulin a pawimawh hle a ni.

‘Awm awl hi setana thlawhhma a ni’ tiin mi thenkhat chuan an lo sawi thin a, hei hi kawng tam takah a dik theihna lai pawh a awm thei awm e. Kan rama nunkawng zawh fuh lo tam tak te pawh hi Zirna School-a kal mumal lo leh tih tur nei lova vak rawlai kan tih  te zinga mi an ni duh khawp mai a, nu leh pa te pawhin kan tu leh fa ten hun awl an neih lohna tur atan leh an phak ang tawka chhungkaw tana hna tangkai an thawh theih nan kan kaih-hruai a pawimawh hle a ni.

Chhungkaw thenkhat chuan hetianga naupang ten nitin zirna School an kal loh lai hian infiamna lam emaw, rimawi zirna lam emaw an zir theihna turin remchang an siam thin a, khaw thenkhat ah chuan YMA lam te pawhin Hnam lam zirna hun remchang te an lo siam tawh thin bawk a, thil tangkai tak a nih ngei a rinawm. Chutihrual erawh chuan sum leh pai kan neih dan te pawh a inchen loh theih avangin keimahni phak tawk ang zela kan kaihhruai erawh a pawimawh ber awm e.