Mizoram mipuite chibai buk

Mizoram State Day 2026-ah ram hruaitu hrang hrang ten Mizoram mipuite duhsakna chibai an buk.

President Droupadi Murmu chuan Social Media account kaltlangin Mizo mipuite State Day chibai bukin, Mizorama chengte chu hnam ziarang mawi tak leh hmun mawi tak nei an nih thu a sawi a, ram hmasawnna tura tha an thawhna hrang hrang chu hlu a tih thu sawiin, hmasawn zel turin duhsakna a hlan a ni. Prime Minister Narendra Modi pawhin Mizoram mipuite Chibai bukin, Mizo hnam ziarang leh nunphung mawi tak chu mipuite hiptu a nih thu a sawi a, tualchhung inrel-bawlna tha tak leh inunaua tha tak bakah midangte inzahtawn taka an awm chu chhuanawm a tih thu sawiin, ram hmasawn ruala hmasawn zel turin a chah a ni.

Anni bakah hian Vice President CP Radha-krishnan te, Union Home Minister Amit Shah, Union Health Minister JP Nadda leh Parliamentary Affairs Minister Kiren Rijiju, DoNER Minister Jyotiraditya M. Scindia, BJP President Nitin Nabin leh Lok Sabha-a Leader of Opposition leh Congress hruaitu Rahul Gandhi te pawhin Mizoram mipuite chibai an buk bawk a ni.