SEC in sawrkar leh political party ngaihdan-a kal ba lo

Mizoram State Election Commissioner Dr. H. Lalthangliana chuan, “SEC hian sawrkar leh political party ngaihdan-a kal hi a ba lo,” a ti.

Aizawl Municipal Corporation (AMC) inthlanpui lo awm tura Official te tan nimin khan Aizawl DC Pisapui Hall-ah ni khat awh Training neiin he hun a hmanpuina ah State Election Commissioner Dr. H.Lalthangliana chuan SEC, Mizoram chu Mizo-ram sawrkar hnuaia function a nih loh thu leh Political party thu hnuaia awm an nih loh thu sawiin, “Inthlan chungchangah chuan Political Party te chu SEC thuhnuaia awm an ni zawk. AMC Inthlanpui leh Budget session awm bichilh lutuk thin hi hmalam hun lokal zel tur atana siamrem tha in AMC chuan a hria a, tuang tichhahin AMC-2026 Election hi a sawn hla mai a ni,” a ti a. “SEC chuan political party te hnenah a tul chuan thurawn te pawh la ang, mahse SEC chuan tha ber tura a hriat angin a kal mai, chu chu SEC inngahna principle a ni. SEC hian sawrkar leh political party ngaihdan-a kal hi a ba lo,” a ti a ni.

State Election Commissioner Dr. H. Lalthangliana chuan Sawrkar hnathawk tan chuan sawrkarna fawng chelhtu tur te thlanna tur thil a nih avangin Election chu a sawrkar hna hliah hliah tih sawiin, “Election lai chuan Election duty tluka hna ngaih pawimawh tur a awm lo. SEC in Election Official tura Appointment Order a chhuah tawh chuan Sawrkar hnathawkte hi SEC hnuaia awm in ni tawh a ni,” a ti a. “AMC election hi felfai taka inkalpui theih SEC chuan a ring nghet bur a. Election hi huhphurh zawnga lak tur a ni lova, rilru zangkhai tak, fimkhur tak leh Confidence neih taka festival anga ngaia, hmachhawn tur a ni zawk. Election laia thil tihsual neih zeuh thin Official te hi  experience ngah tak leh over confident te an ni tlangpui zawk,” tiin he huna tel te chu fimkhur taka hna thawk turin a chah bawk.