Hnamdang nei Hmeichhia te Mizo-na titawpa an fa ten Tribal an nihna an chhawm theihlohna tur pawm

Mizo Hmeichhia ten hnamdang an neih hnua an Mizo-na titawp a Tribal an nihna an fa ten an chhawm theihlohna tur, The Mizo Marriage and Inheritance of Property (Amendment) Bill, 2026 chu nimin khan Assembly chuan lungrual takin an pawm.

He Bill puluttu Law & Judicial enkawltu Chief Minister Lalduhoma chuan he Dan siamthat turah hian Section 2-na an tih danglam tur chu a pawimawh hle dawn tih sawiin, Inneihna zawng zawng chu mipa leh hmeichhe huap veka siam thin a ni a, hmeichhia leh mipa Mizo an nih ve ve leh Mizo mipa hnamdang nupui a neite a huap dawn a, Mizo hmeichhia in hnamdang pasal a neihin a huap ve tawh dawn lo tih sawiin, hnamdang pasala nei Mizo hmeichhiate Mizo-na chu a tawp tawh dawn a, an fate chuan an nu te Tribal nihna te an claim thei tawh dawn lo tih a sawi a ni.

Chief Minister chuan Dan tharah chuan nupui pakhat aia tam neih (bigamy) a khap tih pawh sawiin, nupui pasal then ten midang an nei leh dawn a nih chuan an nupui/pasal hmasa te nen an inthen chiang tawh tih nemnghehna tur Divorce Certificate phut a ni tawh dawn tih a sawi a, hei bakah hian dan hmanlai-a nupa inthenna tlak nia danin a sawi Phar natna nei tih tel chu Phar natna neih chu vanduaina thil a ni a, Inneih thutiamah “hrisel lai leh bawrhsawm lai pawhin” tia thu an tiam thin avangin phar natna vanga inthen phal ringawt chu a dik lo tiin Phar natna (Leprosy) hi an paih thu a sawi bawk.

Roluahna Certificate chungchang pawh dah thar a ni tih Chief Minister chuan a sawi a, Women Commission leh MHIP te rawt angin hmeichhiate venhim nan hmeichhiain sum an chhuah chuan inneiha a chhawmluh piah lamah an nupaa an thawhchhuah dun atanga zaa 50 pel lovin hmeichhia in a chang ve thei tawh dawn a. Marriage Price tih chu Mizo tawngin ‘Man leh Mual’ tia thlakdanglam rawt a ni bawk.

The Mizo Marriage and Inheritance of Property (Amendment) Bill, 2026 hian Dan hman lai hming ‘The Mizo Marriage, Divorce and Inheritance of Property Act’ tih chu Kristiante chu damchhunga innei tura thutiam thin an nih angin Inneihna dan leh Inthenna dan awm kawp chu a rem lova, chuvang chuan ‘Divorce’ chu paihin ‘Inneihna Dan leh Ro inluah dan’ tia thlak a ni a, Automonous District Council pathumte a huap lo tura tih ni mahse ADC huamchhunga Mizo Customary Law hmang engemawzat te chu a huap tho dawn a, mahni Hnam dan neite erawh chu a huap loh ngaiin a huap lo reng dawn niin he Bill puluttu Chief Minister Lalduhoma chuan a sawi a ni. He Bill hi Member ten an sawiho hnuah lungrual taka pawm a ni.