Sawrkar hnathawk aikal la mi 37 te hrem an ni tawh

Department of Personnel and Administrative Reforms (DP&AR) changtu Minister K. Sapdanga chuan Mizoram sawrkarin sawrkar hnathawk aikal la mi 37 a hrem tawh thu sawiin, mi 29 chu an hna atanga chawlhtir an nih thu a sawi.

Nimin-a Assembly thutkhawm zawhna leh chhanna hunah ZPM Member VL. Zaithanzama, Lt. Col. Clement Lalhmingthanga leh Jeje Lalpek-hluate zawhna intâwm chhangin DP&AR Minister K. Sapdanga chuan, “Mizoram sawrkar ah MCS Junior Grade post 82 a awm a, tunah hian 50 luahkhah a ni a, Post ruak 32 a awm,” tiin, District Headquarters-a Deputy Commissioner Office-ah Gazetted Post sanctioned 102 a awm thu a sawi a. “Mizoram sawrkar hnuaia MCS post awm zawng zawng 251 niin 212 hnawhkhah a ni a, post ruak 39 a awm,” a ti bawk.

DP&AR Minister K. Sapdanga chuan Department chhunga aikal la an awm leh awm loh chu Secretary, Head of Department leh Controlling Authority-te mawhphurhna a nih thu a sawi a, “Anni hian report dik tak an pek a ngai thin. Aikal la mi 37 hrem an ni tawh a, aikal la hrem zinga 29 chu an service tihtawp a ni,” tiin zawh belhna a chhang bawk.

DPAR Minister chuan, sawrkar hnathawk aikal la an hrem zingah mi pariat chu hremna nêp deuh zawk hmanga hrem an nih thu sawiin, “An ACR-ah te ziahlan a ni a, an service zel atan a pawi thei a ni,” a ti. MCS transfer & posting chungchang pawh sawiin Minister K. Sapdanga chuan, “An awmna tur Department azirin an thiamna, experience, promotion hmuh dan, etc kan ngai pawimawh. Chumi piah lamah humanitarian ground-in anmahni leh chhungte hriselna dinhmun azirin ngaihtuahna sen thin a ni,” a ti a; an thiamna hmun bera thawhtir chu an tum dan a nih thu a sawi bawk.