Serchhip District-a bawlhhlawh lakkhawm leh sawngbawl hna kalpui mek thlirho a ni

Serchhip District chhunga Green Herd SP ten bawlhhlawh lakkhawm leh sawngbawl hna an kalpui mek dinhmun leh harsatna an neih te chu nimin khan Serchhip Town Sanitation Task Force thukhawm chuan an sawiho.
Faina kawnga hmalakna atan Sawrkar leh Green Herd SP te hian Serchhip District chhung khaw hrang hrangah leh Serchhip Town Area hmun thenkhat ah thawkho in bawlhhlawh khawnkhawm leh sawngbawl hna an thawk mek a. Green Herd SP ten bawlhhlawh an la khawn theih lohna khua hi Serchhip khawpui pawn ah khaw 5 chauh a awm tawh a. Serchhip khawpui chhung bikah New Serchhip Area bikah bawlhhlawh thliarhran leh sawngbawl hna kalpui mek a ni thung a. Nimin khan Serchhip Town Sanitation Task Force chu Serchhip DC Meeting Hall-ah an Chairman leh Bawrhsap Paul L. Khuma hova thukhawmin Green Herd SP te hmalak dan thlirho niin an harsatna tawh dan te leh chinfel dan tur te sawiho a ni a. Serchhip Lungrual Mual-a bawhhlawh sawngbawlna hmunah hian khawl hmanga bawhhlawh tihral te, a hralhchhuah theih ang hralh bakah hralh tlak loh te pawh Mizoram chhunga chambang lova tihral a nih thu he hunah hian tarlan a ni.

He thutkhawm ah hian Chhiahtlang khawtlang hruaitute atanga thu lut, bawlhhlawh thliarhran leh khawn dan chungchang chu Green Herd SP te nena ruahmanna thar siam turin rel a ni a, thutlukna felfai tak an neih hnuah Committee hnenah an hriattir leh dawn a. Serchhip Vengchung VC area a bawlhhlawh paihna hmun an hman mek pawh hman chhunzawm a rem tawh dawn loh avangin UD&PA Department te nen inberawnin ruahmanna siam nise an ti bawk.

Heng bakah hian Bawlhhlawh paih dan chungchang te, tawih thei leh thei lo thliarhran chungchangah te ngawrh lehzuala mipui zingah inzirtirna kalpui chhunzawm zel nise tih te pawh thutkhawm ah hian rel a ni a. DLAO, PHE Department leh DRDO te nen tanghoin khawtinah Gram Sabha hmangin zirtirna kalpui nise aan ti a. Tlawmngai pawl hrang hrang YMA, MHIP, MUP, Chanchinbumite leh pawl dang te pawh mahni remchanna apiangah bawlhhlawh thliarhran leh paih dan chungchang inzirtir tura ngen an ni bawk. Sawrkarin bawlhhlawh paihna hmun tura a siam hmun bik ni lo, hmun danga bawlhhlawh paih chu dan bawhchhiatna a ni tih he hunah hian sawilan nawn leh a ni a. Dan anga hrem theih an nih thu leh hetiang lo ti thin an awm chuan thuneitute hnena thlen zel turin Sanitation Task Force thutkhawm chuan an ngen a ni.