Leiba hnutchhiah lo turin tan an la tih CM-in a sawi

Nimin-a Assembly Session-ah Finance enkawltu Chief Minister Lalduhoma chuan, sawrkar kalta te leibâ an rulh mek thu sawiin, “Sawrkar leh turte leiba hnutchhiah lo turin theihtawp kan chhuah,” a ti a. Leader of Opposition Lalchhandama Ralte chuan sawrkar thar apianga leiba rulh a nihin, sawrkar kal tawhte leiba an ti ngai lo niin a sawi thung.

Nimin a Assembly thutkhawm ah hian MNF Member Robert Romawia Royte zawhna chhangin Chief Minister Lalduhoma chuan, “Sawrkarin leiba hnutchhiah a tum lo tih hi sum pûk leh leiba (Borrowing rulh bâng Outstanding debt) sawina a ni lo a, kan hnunga mite rulh tura thil lo lei bat emaw, sum awm si loa hna lo inthawhtir ringawt emaw vanga ba siamchawp (Committed liabilities) sawina a ni,” a ti a. Committeed liabilities siamtu tam tak chu Budget provision awm si lova Supply Order issue leh Work Order pek a ni ber tih sawiin, “Heng hi tun sawrkar chuan pumpelh kan tum,” a ti.

He hunah hian Leader of Opposition Lalchhandama Ralte chuan, MNF sawrkar pawhin an hmaa leiba tam tak an chhawm nia sawiin, “Congress leiba kan ti ngai lo. Hetianga thusawi hi kalphung thar tha lo tak a ni a, sawrkarin kan rûl ti mai se. Sawrkar kal tawh zawng zawngin kan tih thin dan a ni. Kan Chief Minister hian mei nei deuh leh tai neia thusawi a hrât thin. Mawhphurhna kan lak tawh avangin sawrkar kalta te leiba kan ti ngai lo. Mawhphurhna la ngam sawrkar an ni lo em ni, an mawhah a tla tawh,” tiin Chief Minister thusawi thin dan chu democracy kalphung a nih leh nih loh a zawt a ni.

INC Member C. Ngunlianchunga pawhin 'Sawrkarin kan rulhsak ti lovin, sawrkarin leiba a rûl' ti mai se a duh thu sawiin, MNF Member Dr. R. Lalthangliana chuan Chief Minister chu hun rei tak Opposition-a awm tawh a nih thu sawiin, “Mi han khak zauh zauh ang chi kha paih a har a niang, a sawi dan ki a thlak ve hlek hlek turah ngai ang. Hriatthiamna nei ve ila. Rei tak kan sawrkar tawh a, Congress-in District panga an puang a, engmah an ti hman lo. Tha kan ti a, kan tihlawhtling mai. Leiba ah kan chhiar ngai lo. Tute emaw kan mawhpuh zel chuan a fel loin ka hria,” a ti bawk.

Chief Minister Lalduhoma chuan, mawhphurhna an lak avangin an hmaa mite kihhnawk an thian chho zel nia sawiin, “Thu dik kan sawi a ni. Committed liabilities kan rûl chho ngat ngat a, kum thum chhunga rulh fel kan in beisei,” a ti. Chief Minister sawi danin, kum 2018 atanga Committed liability tlingkhawm hi PWD-ah cheng nuai 1,287 an rûl tawh a, rulh tur nuai 583 a la awm; PHE-ah nuai 4,842 rûl tawhin, rulh tur nuai 5,801 a la awm a, Power & Electricity Department-ah nuai 182 rulh tawh niin, rulh tur nuai 1,262 a la awm a ni.