Ration Card Pawl-a awm thei zat hnawhkhah niin Card Sen-ah mi 60,000 thun leh tum an ni

Food, Civil Supply & Consumer Affairs (FCS&CA) Minister B. Lalchhanzova chuan sawrkar laipui in Mizoram-a Ration Card Pawl-a awm thei zat tura a bituk chu hnawhkhah a nih tawh thu sawiin, Ration Card Sen-ah mi 60,000 thunluh leh turin ruahmanna siam a nih thu a sawi bawk.

Nimin-a Mizoram Legislative Assembly thutkhawm zawhna leh chhanna huna MNF Member Prova Chakma zawhna kal zela Member ten mi harsa tak tak te Ration Card Var-ah an la awm thu leh Card Pawl-ah awm theih tir dan a awm em tih zawhna chhangin Supply Minister B. Lalchhanzova chuan sawrkar uluk tak a ngaihtuah thu a sawi a. India sawrkar in National Food Security a kalpui ah sawrkar laipui in Mizoram chu mi 7,06,296 quota min pek thu leh hetah hi Mizoram mipui nuai 12 vela zinga khaw tina harsa zual te chu khung theih awm tak a nih laiin NFSA in a huam loh erawh an la tam thu a sawi a. Hei hi chinfel tuma nasa taka an beih thu leh sawrkar chuan ngaihtuahna siamin buhfai kg. ah Rs. 20/- a khul turin Ration Card Sen hmang tur ‘Mizoram State Special Ration package’ a siam thu a sawi a ni.

Supply Minister chuan tun dinhmunah Ration Card Sen ah hian mi 70,000 vel thun an nih tawh thu leh mi 60,000 vel allotment thar tihchuah leh tawh a nih thu pawh sawiin, Card Var-a la awm zinga khawtlang pawhin dinhmun harsa nia an sawi te chu thun tur niin DCSO mawhphurhna a ni ang tih a nih thu a sawi a. Card Var zingah mi harsa deuh an la awm a nih chuan an Area DCSO mawhphurhna a nih dawn thu a sawi bawk.

Rualbanlo leh piangsual bakah kum lama upa tawh, Fingerprint pe tura a hmun kal thleng thei lote tana ruahmanna chungchang zawhna chhangin FC&SCA Minister chuan Finger Print hmu thei lo te tan Department chuan ruahmanna siamin, Retailer zawng zawngah IRIS Scanner a dah belh vek tawh tih a sawi a, “Finger print an tih theih loh avangin Ration Card-ah delete tur an ni lo,” a ti a. Finger print ti thei lo te tan ruahmanna chi hnih an siam thu sawiin, “Thenkhat ah chuan Retailer-te'n an In-ah kalchilhin an Finger Print an la sak a ni,” a ti a, hmun thenkhatah chuan retailer-te dawrah an chhungte'n an hruai thu a sawi bawk.

INC Member C. Ngunlianchunga'n an Bial Damlui Retailer-in LADC inthlanah Congress a Vote vanga ZPM Unit-in Department-ah an hek thu a sawi chungchangah FCSCA Minister chuan, “Sawrkar kal tawhte hangover kan la tuar,” a ti a, sawrkar kal tawhte tihdan tha lo ti ve lo turin an party mite an inkhap nasat thu a sawi bawk.