Mizoram State Day pualin Serchhip-ah Ram tana tawngtai rualna neih a ni

Nimin February 20, 2026 kha ‘Mizoram State Day’ niin he ni pual hian Mizoram hmun hrang hrangah Ram tana Tawngtaina ni, State Day of Prayer atan hman a ni a, Serchhip-ah pawh New Serchhip YMA Hall-ah he ni pual hian tawngtai rualna neih a ni.
Mizoram State Day puala Serchip-a Tawngtai rualna hi Serchhip Bawrhsap leh State Day of Prayer-a Patron, Paul L. Khuma chuan hmanpuiin Mizoram-in State puitling kan neih dan chanchin a sawi a, ram buai thim chhah paltlang a, State zalen kan lo neih dan te, chumi ni denchhena ram tana tawngtaina ni hman a nih dan te sawiin, “Kan ram mawi leh boruak nuam tak te, inpumkhatna leh inunauna kan neih te, faina leh thianghlimna kawnga kan hmalakna te hi mi dangte entawntlak a nih laiin; a chhe lamah - Drug leh Zu ngawlveina te, HIV positive leh nupa inthen tam lutuk te hi kan vei a ngai tak zet a ni,” a ti a. Serchhip District pum huap Ruihhlo ngai Camping neih zawh tak hlawhtlinna te sawiin Bawrhsap chuan, Camp chhuakte tan tihtakzeta tawngtai zel turin mipuite a sawm a. “Kan ram leh kan hnam, kan fate tana bang lova tawngtai thin nu leh pa nih i tum theuh ang u,” tiin he huna kalkhawmte chu a sawm a ni.

State Day of Prayer hi politics emaw, eng party emaw hmalakna ni lovin pawl leh Kohhran zawng zawng inthliarna awm lova ram pum huapa tawngtaina ni anga kalpui a ni a. Kum 2024 atanga kalpui tan niin kumin hi a tum thumna a ni a, Thupui atan ‘I din thar leh ang u’ (Nehemia 2:17) tih chu rampumah hman niin New Serchhip YMA Hall-a hun hman hi Serchhip District State Day of Prayer-a Working Chairman Rev. Laltanpuia Colney chuan a kaihruai a. Rev. K. Lalhmingmawia’n tawngtai thupui hawngin, Thupui hrang hrang hmanga tawngtai rual a nih a nih hnuah Secretary, Upa F. Ramdinpuia’n lawmthu sawiin hun a khar a ni.

Aizawl-ah chuan State Day of Prayer hi Lammual-ah Chief Minister Lalduhoma hova hman a ni a; State Day of Prayer of Worship Team-te kaihhruaiin chawhma dar 10:30 atanga chhun dar 12:30 thleng zaihona leh tawngtai hona neih niin Aizawl khawpui hmun li atangin ke-a kawngzawh leh hmun thum atangin Two Wheeler hmanga kawngzawh a ni a, Lammual-ah an intawkkhawmin State Day of Prayer Committee Chairman Rev. Lalramliana Pachuau kaihhruaiin hun hman zui a ni a, Chief Minister Lalduhoma bakah State Day of Prayer Committee Working Chairman F. Rodingliana, Minister of State te pawhin thu an sawi a ni.