Unnati Scheme chungchang sawrkar in a sawifiah

Mizoram sawrkar-a Tourism Department chuan ‘ Uttar Poorva Transformative Industrialization Scheme (UNNATI) 2024’ chungchang sawifiahin, mi 44 te Consent to Establish pek an nih tawh thu an sawi.

UNNATI-2024 chungchangah mipuiten thudik leh he Scheme-in a tumte an hriat theih nana thuchhuah an siamah Tourism Department chuan Unnati Scheme chu North East State te Industry Sector-a hma an sawn theihna tura Back ended subsidy 50% thlenga claim theihna tura duan a nih thu a sawi a. He Scheme hian Tourism Sector- Hotel, Homestay, Picnic Spot leh Resort etc. te pawh a huam thu leh Unnati Scheme hnuaia Incentive hmuh theihnate chu – Capital Investment Incentive (CII), Capital Interest Subvention (CIS) leh Manufacturing & Service Link Industry (MSLI) te an nih thu an sawi a. Tun dinhmuna mipuiin an hriatfiah tul nia lang chu Capital Investment Incentive (CII) a nih thu leh he Incentive hi GST pek ngai ah leh GST pek ngai lo ah then hran a nih thu an sawi a. GST pek ngai ah hian Incentive sang thei ber chu cheng vbc. 7.5 niin hemi hmu tur hian Project Cost cheng vbc. 15 aia tlem lo a nih a ngai a. Chutih laiin, GST pek ngai lo Industry-ah chuan cheng vbc. 10 chu Incentive hmuh san theih ber a ni a, Project Cost chu cheng vbc. 20 aia tlem lo a nih a ngai thung. Mi thenkhatin incentive hmuh san theih ber cheng nuai 250 nia an sawi chu an hriatsual palh a nih a rinawm tih an sawi bawk. 

Tourism Department chuan Unnati Scheme hi a tam thei ang berin hmang tangkai se an duh thu leh District leh khaw hrang hrang tlawha Official-te an zinchhuahna ah an sawi darh zel thin thu an sawi a. Tourism Sector-a Unnati dil tur hian a hmasa berin Department atanga ‘Consent to Establish’ lehkha neih a ngai a. Director, Tourism Department-ah Consent Letter hi dil tur a ni tih a sawi a. An hmunhma te endik a nih hnuah Consent Letter hi pekchhuah thin a ni.

Unnati Scheme hi DPIIT enkawl a nih angin DPIIT hian documents leh a tul dangtea a diltute puitu turin Grant Thornton Company atangin Consultant pakhat chu Mizoram-ah an a ni.Tourism Sector bik atan chuan incentive hi an infrastructure siam te an zawh hnu, an Hotel/Homestay leh a dangte an operate hnu, Tourism Department registration an neih fel vek hunah chauh claim hi an hmu thei ang tih an sawi.

He Scheme hi extend a nih loh chuan ni March 31, 2026 hma ngeiin Portal-ah documents kimchang nen dilna upload hman tur a ni a. February 19, 2026 thleng hian Tourism Department chuan Consent to Establish hi mi 44 tan a pe chhuak tawh a. Heng mi 44 te hian Unnati Scheme hnuaiah incentives hmuh an inbeisei vek avangin Loan an la a nih pawhin Unnati Scheme behchhana Bank Loan la anga ngaih vek an ni tih an sawi bawk.