Thenzawl naupang pathum tui tla te vuiliam an ni

Thenzawl khuaa mipa naupang pathum tui-a tlahlum te chu an ruang lumen a nih hnuah nimin khan vuiliam an ni.
Heng mipa naupang pathum Thenzawl Vengthar-a cheng- H. Lalhruaitluanga (9) S/o H. Laldawngkima; Lalmuansanga (9) S/o Lalthangpuia (L) leh C. Lalbiakhluna (7) S/o Lalfakzuala te hi Inrinni, Feb. 21, 2026 khan chhun lamah inkawmin zanriah ei hun thlenga an chhung ten an chin an hriat tak loh avangin an zawng a, an thian pakhat chuan Dil-ah tui cheng tura an kal thu a sawi avangin Thenzawl Vengthar-a Cooperative Society Dil ni thin, tuna mimal enkawl Dil pakhat chu enfiah a ni a, Dil kam-ah hian an Chapal te a lo awm bawk avangin tui chhung-ah zawn nghal an ni a, Inrinni zan thimhlim khan an ruang hi an hmu ta a ni.

Heng naupang pathum te vanduaina tawk lai hi hmu an awm loh avangin an chetsual dan hi chiang taka hriat theih a ni ta lo a, an ruang hi Then-zawl Vengthar Branch YMA President, H. Lian-sanga In-ah lak a nih hnuah an chenna In-ah theuh lak a ni a, Inrinni zan khan Thenzawl Vengthar-a Bengkhuaia Hall-ah lumen niin nimin khan an chenna In ah theuh vuiliam an ni.

Chief Minister Lalduhoma chuan a Social Media account-ah a a bial chhung Thenzawl Vengthar naupang pathumte Society Dil-ah chesualin an nunna hlu tak an chan tih a lo hriat thu leh hrehawm tiin pawi a tih thu a sawi a. “An kalsan tak an chhungkua leh he thihnain a nghawng zawng zawngte hnenah Pathian thlamuanna lo thleng mawlh rawh se,” a ti a ni.