Vawiin hian Serchhip-ah Mock Drill neih a ni leh dawn

National Disaster Response Force (NDRF) kaihhruaiin Vawiin chawhnu hian Govt. Serchhip College-ah Lirnghing (earthquake) chungchang ah Mock Drill neih a ni dawn.
He Mock Drill neih tur chungchang hi nimin khan Serchhip DC Meeting Hall-ah Bawrhsap, Paul L. Khuma kaihhruai in sawiho a ni a, ruahman lawk ang chuan Mock Drill hi Vawiin chawhnu dar 2:00 hian neih tur niin Staging Area atan Serchhip DC Pisapui hman a ni anga. Lirnghing in a tihchhiat tur hi Govt. Serchhip College Administrative Block niin he hunah hian chhanchhuah leh chhawmdawlna hna thawktu hrang hrang ten chhanchhuah leh chhawmdawl hna an thawk dawn a. Nimin-a thutkhawm ah hian Mock Drill neih tur atana mawhphurhna hrang hrang siamfel a ni a, thutkhawm neih zawh hnu hian Mock Drill-a tel turte tan lirnghinna hmuna chhanhimna hna thawk turte leh mawhphurhna dang neitu tan inhrilhhriatna hun buatsaih zui a ni.

He thutkhawm ah hian Bawrhsap Paul L. Khuma chuan Serchhip-a Mock Drill an lo neih tawhah department hrang hrang te, tlawm-ngai pawl te, mipui mimir te bakah Assam Rifles leh BSF te thawhhona a tha em em tih a sawi a. Tun tuma District Level Mock Drill neih turah pawh mawhphurhna neitu zawng zawngin tha taka an hlenchhuah a beisei thu leh mipui mimir te tan pawh chhiatna a thlen thulha inzirna tangkai tak a nih a beisei thu a sawi a ni.