Kohhran leh chhungkua-a inzirtir tul tih thu sawi

Central YMA General Secretary Prof. Malsawmliana chuan ruihhlo la ti lo te venghim turin Kohhran huangchhung leh chhungkua atanga inzirtir a tul thu a sawi.

Zirtawpni khan Lengpui Model Branch YMA chuan YMA Kumpuan, 'Ruihhlo Do' hawnna hun buatsaihin he hun a hmanpuina ah Central YMA General Secretary Prof. Malsawmliana chuan YMA chu khawtlang hmachhuan a nih thu leh YMA a chak loh chuan khawtlang ah sualna pawh a lo pun thin thu a sawi a. Ruihhlo la ti lo te venhim kawngah Kohhran huangchhunga inzirtirna leh Chhungkua atanga inzirtir a tul thu sawiin, YMA Kumpuan Kaihhruaina in a phut angin Chhungkaw Zan siama inzirtirna hun hmang theuh turin mipuite a chah bawk.

Central YMA General Secretary chuan mahni hnampui ngei nupui pasal neih chu hnam himna a nih thu pawh a sawi a. Hmakhaw thlir uluk a ngai tih sawiin, Mizo chu hnam tlemte an nih avangin mahni hnam pui ngei neih a pawimawh tih a sawi a. Nu leh paten mahni fate nupui pasal zawn kawngah fimkhur pui a ngai tih sawiin, hnam rilru put a pawimawh thu a sawi bawk.