Aizawl East leh Aizawl West DCSO Office sa dawn

Aizawl East leh Aizawl West District Civil Supplies Officer (DCSO) Office building sak thar tur lungphum chu nimin khan Supply Minister B. Lalchhanzova chuan MINECO-ah a phum.

Building thar sak tur lungphum phumna hunah hian Supply Minister chuan Aizawl District-a DCSO Office pahnih awmte chu an awmna a inhlat deuh avang leh Office building pahnihte chu mimal In, sum chawia luah a nih ve ve avangin mahni puala Office thar a ding tur chu lawmawm a tih thu a sawi a. Kum 39 chhung Office atan mimal In luah a nih hnua mahni puala Office tha tak an nei ve tawh tur chu lawmawm a tih thu a sawi bawk. Miniser chuan Office hlui leh chul rup mai hian a thawktu leh a dawrtute rilru thui takin a nghawng thu sawiin, Office thar tha tak an neih hunah chuan thawktute pawh phurna nasa zawk a pek a beisei thu a sawi a. Mahni bialtu DCSO hriat fuh loh avangte, DCSO awmna insawn ngaite leh Office pahnih dawr kawp ngaite tan chuan DCSO pahnihte hmunkhata dahkhawm anni tur chu awlsamna thlentu a nih bakah sum leh hun tam tak hum saktu a nih a beisei thu a sawi bawk.

Aizawl East leh West DCSO building hi cheng vbc. 8 senga SASCI 2024-25 (Part - I) atanga sak tur niin, Mizopa chhiara chhawng 6-a sak tur a ni a. A building pum hi square feet 18,341 tura ruahman a ni a, thla 30 chhunga sak zawh tura ruahman a ni. A sak hna hi Eastmen Consultancy, Aizawl ten an thawk dawn a ni.

Nimin-a hemi puala hun hman hi FCS&CA Secretary Teresy Vanlalhruaii’n a kaihruaia a, a sak hna thawk tur Eastmen Consultancy-ten hna kalpui dan turte an sawi bawk a ni.