Ruang phurhna tumsak duh

Kolkata-a Mizo awmte chuan Kolkata atanga Mizoram-a ruang phurh haw ngaite senso chhawk nan sawrkarin Mizoram chhunga a hman mek, ruang phurhna senso a tumsak thin ang chu hman ve theih nise an duh thu a sawi.

West Bengal khawpui tlawha IPR Department buatsaiha zin mek Mizoram Journalists’ Association (MJA) member-te leh Kolkata Mizo Welfare Association (KMWA) hruaitute chu Pathianni tlai khan inkawmin Kolkata Mizo Welfare Association (KMWA) hruaitute chuan Kolkata chu Mizoten ramchhung leh pawn hmun dang an tlawh dawna an chhuahka a nih piah lamah damlo inentir an tam em em reng tih an sawi a. Heng zingah hian ruang nena haw ngai an awm fo thin a, tih tur tul hrang hrangte an buaipuisak thin tih an sawi a ni.

KMWA President C Lalmuanzuala chuan, “Thlawhnaa ruang pakhat phurh hawna man bik chauh Rs. 15,000/14,000 vel sen a ni thin a, ruang sawngbawlna leh tul dang zawng zawng chu Rs. 40,000/50,000 vel zet a ni thin a; rei tak damlo inenkawl tawhte tan a hautak lutuk thin a ni,”  tiin August, 2025 atanga tun thlengin ruang 15 thawn an ni tawh tih an sawi bawk.