PWD Serchhip Division hnuaia hmalakna kal mek thuthar thehdarhtuten a hmunah an tlawh
MJA Serchhip District Member hi PWD Serchhip Division-a Sr. EE, Er. PC. Zokhuma leh SDO, Lalrinhlua te bakah thawktu dang ten lo dawngsawngin tunhnaia an hmalakna te hi an tlawhpui a, chawhma lam khan Serchhip Mat Phai atanga Zote South panna kawng laihzauh leh siamthat hna, ‘Improvement of Serchhip District (Chawmkai) to Zote South Road’ thawh mek chu en hmasa berin he kawng hi KM 14 vela thui a ni a, May 14, 2025 khan he hna hi thawh tan niin nakum March 14-ah zawh hman tura ruahman a ni a, tunah hian kawng laih hna hi zawhfel tep a nih thu leh huntiam chhunga zawhfel hman ngei an inbeisei thu he hna thawktu, Huapzo Construction & Consultancy Services, Bawngkaw Shalom, Aizawl chuan an sawi a. He hna atana Agreement Amount chu Rs. 21,80,92,941.13 niin kawng hi meter 6-a zau-a laih tura ruahman niin KM 8-a thui chu Blacktop tura ruahman a nih bakah KM 6-a thui chu PCC tura tih a ni a. PWD hotute chuan helai kawng-ah hian tui tamna hmun leh dam a tam avangin heng hmun te hi PCC tura ruahman a ni tih an sawi a. A tira ruahman bakah kawng hlui paiha kawng thar siam a tam thu pawh sawiin, he kawng siam mekah hian Lei tenau dawh tur pahnih a awm bakah Retaining Wall meter 80 vel rem tur a awm thu an sawi bawk.
Hemi hnu hian NABARD sum hmanga Serchhip Mat Phai intlawhpawhna kawng siam hna thawh mek, ‘Construction of Link Road and land Improvement at Zawlpui’ chu tlawh lehin he hna hi nikum May 3 khan thawh tan niin nakum March 3-a zawhfel hman tura ruahman a ni a, Agreement Amount chu Rs. 9,63,30,359.97 niin Evergreen Construction & Consultancy, Khatla, Aizawl chuan an thawk a ni. He hna ah hian Zawlpui to Lumtui (2 km); Zawlpui Farm Road (1.33 km); AC. Zohmangaiha Thlam to Zokhuma Thlam (0.5 km); Zawlpui to Chamdur (2 KM) leh Chawmkai to Zuangleng (5 KM) te thawh tur niin Hectare 83-a zau Land Development hna thawh tura tih a ni bawk a, heng kawng hi meter 3- zau in PCC-a siam niin he hna hi tun Thal chhunga zawh hman an tum thu he hna thawktu Evergreen Construction & Consultancy, Khatla Aizawl chuan an sawi a ni.
Evergreen Construction & Consultancy, Khatla Aizawl ten Bawngchawm tlang panna kawng siam hna an thawh mek, ‘Widening and Improvement of Approach Road Paragliding Ground at Serchhip’ pawh hemi hnu hian tlawh nghalin he hnaa Agreement Amount chu Rs. 3,45,63,310.77 a ni a, nikum May 8 khan thawk tanin nakum (2027) June 8-ah zawhfel hman tura ruahman a ni a, KM 4.7 a thui tur niin Sailiamkawn atanga Bawngchawm tlang panna kawng niin Chuanhnuai lama chhuak leh a ni.
MJA Member te hian New Serchhip Kikawn atanga Serchhip Hmar Veng panna kawng siam hna thawh mek, ‘Improvement of Kikawn to Hmar Veng, Serchhip’ pawh tlawh lehin he hna hi NABARD sum Rs. 15,51,98,719.23 senga thawh tura ruahman a ni a, nikum May 14 khan thawh tan niin nakum March 13-a zawhfel tura ruahman a ni a, he hna hi Studio Hamlet, Champhai Vengthlang ten thawk mekin he hna thawh mekah hian Kikawn atanga a penna chu tihzauh a tul avangin a chung kawngpui kam-a ke-a kalna chu tihchhiat a ngai dawn a, hei vang hian Kikawn atanga New Serchhip panna kawngpui pawh hi zauh tura ruahman a ni bawk a, hna tan thuai tum a ni.
MJA Member te chuan heng hna hrang hrang thawktute chu Serchhip tana rotling siam hna thawktu an nih avangin sawrkar in ruahmanna a siam anga a tha thei ang bera thawk tura an beisei thu an sawi a ni.
A tha dawn e.cm bial nih man a awm leh ta e.tha tak vek a thawk tur In I bei sei phawt ang.
ReplyDelete