Budget-ah Revenue Expenditure-a sum dah a tam

Kum 2026-27 Mizoram Budget pharh takah Budget pumpui atangin hmasawnna hna thar thawhna tur, Capital Expenditure chu zaa 17.46 a ni a, sawrkar inrelbawlna senso Revenue Expenditure chu zaa 82.53 ni tura chhut a ni.

Kumthar Budget atanga ram hmasawnna ruhrel pawimawh hrang hrang kawngpui siamna, khawl leh bungraw lian leina te, ram Economy siamthatna atan leh mipui mamawh tihhlawhtlinna tur, Capital Expenditure atan sum dah zawng zawng chu cheng vbc. 2,982.44 a ni a, hei hi Budget pumpui atanga zaa 17.46 a ni a. Capital Expenditure-a sum dah hi Sawrkar kum kal meka sum dah chu cheng vbc. 2,658.56 aiin cheng vbc. 323.88 in a tam zawk a, a punna hi zaa 12.18 a tling a ni.

Sawrkar hnathawk hlawh leh pension senso, zirna, infiamna leh kawngpui enkawlna ang chi te, mipuite hnena tui leh kawlphetha pekna senso leh sawrkar inrelbawlna chi hrang hranga sum hman tur, Revenue Expenditure a hman tur cheng vbc. 14,094.47 dah niin, hei hi Budget pumpui atanga zaa 82.53 zet a tling thung a. Sawrkar kum kal mekah Revenue Expenditure aiin cheng vbc. 1,709.77 zetin a tam zawk a. Revenue Expenditure-a sum dah tam a nih chhan chu Sawrkar inrelbawlna hrang hrang zingah kawlphetha leina, kawngpui, water supply leh Sawrkar building hrang hrang enkawlna atan Sawrkar sum puk rulhna atan a sum a kal nasat vang a nih thu Chief Minister Lalduhoma chuan a sawi a ni.