Larsap in State Day puala mipuite chibai bukin inhlan thar leh theuh turin a sawm bawk

Mizoram Larsap General (Dr) Vijay Kumar Singh chuan nimin, February 2026-a Mizoram State Day pualin Mizoram leh ram chhung mipui zawng zawngte Chibai bukin, Mizoram leh India ram chak leh hmuingil din turin inhlan thar leh theuh turin mipuite a sawm bawk.
Mizoram State Day puala thu thuchah a siam ah Mizoram Larsap General (Dr) Vijay Kumar Singh chuan February ni 20, 1987 khan Mizoram chu India ram State 23-na ni tura puan a nih thu sawiin, hemi hnu hian Mizoram chuan muanna, hmasawnna leh hlawhtlinna kawng hrangin a zawh chho tih a sawi a, “He ni chhinchhiah tlak tak hi Mizo mipuite chhelna, inpumkhatna leh suangtuahna a taka nemnghehna chiang tak a ni. Dawhkan kila inbiakna, mipui thlan rorelna leh inremna a taka tihhlawhtlinna lantir a ni a; hei hi chiang takin June ni 30, 1986-a Sawrkar laipui leh Mizo National Front-te inkara inremna thuthlung ziah khan a entir a, he inremna hi India ram chanchina inremna thuthlung ziah tawha hlawhtling leh tlo berte zinga mi a ni,” a ti.

Larsap chuan State nih hnuin Mizoram chuan kawng tinrengin hmasawnna hmel thar chhinchhiah tlak tak tak a hmuh thu pawh sawiin, “Rampum huapa hriat a hlawhna em em hnam ziarang hausa tak, nunphung nghet tak leh khawtlang inlungrualna hloh chuang lovin zirna, hriselna, hmasawnna ruhrel din leh ngelnghet siam kawngah pawh nasa takin hma a sawn a ni,” a ti a. Tunhnaia hmasawnna langsar zual zingah chuan September ni 13, 2025-a Prime Minister-in a rawn hawn tak km 51.38 a thui Bairabi-Sairang Rel kawng hawn tarlangin, “Hei hian a vawi khat nan Aizawl chu India ram khawpui dangte nen Rel hmanga thlunzawm a ni. He hmasawnna hian zin veivakte remchanna siam sakin man tlawm zawka zin, bungraw phurh leh khualhip thlengin nasa takin danglamna a siam a, khualzin pawh kum kalta khan 139.5% laiin a pun phah a ni. Hemi belhchhah tur hian tunhnai lawk February ni 9, 2026 khan Silchar-Sairang inkar tlan Rel pawh hawn niin, hei hian Rel hmanga inkalpawhna a tihchangtlun phah a ni,” a ti.

May ni 20, 2025 khan Mizoram chu ULLAS hmalakna hnuaiah 98.20% lai hmuin India rama ziak leh chhiar thiam vekna State hmasa ber atana puan a nih thu pawh Larsap chuan sawiin, “Hei hi zirna huapzo leh thuamchak kawnga hlawhtlinna mellung pawimawh tak a ni,” a ti a. India Skills Northeast Regional Competition 2025-26 neih zawh takah Mizoram chu pakhatna niin hei hian thiamthil leh theihna Mizoramin a neih tam zia leh haichhuah hmabak pawh a la awm nual tih a tarlang tih a sawi bawk.

Sawhthing quality tha, leichi hmang lo deuh vek tharchhuah tam avang leh chin uar deuh deuh anih avangte in nikum December thla khan NITI Aayog chuan Mizoram chu Sawhthing khawpui, ‘Ginger Capital of India’ atan a puan thu leh Mizoram hian leichi tel lo buh leh thlai bakah ramhmul damdawi, thlai rimtui, mau, oil palm, rubber leh inghahna tlak dangte tam zawk thar thei turin theihna nasa tak a neih thu Larsap chuan a sawi a. “State ralmuang tak, mawi leh hnam ziarang hausa, khawtlang inlungrual, sik leh sa nuam, fai leh boruak thianghlim thlenga nei a nihna hi Mizoram thangmawina leh mite ngaihhlutna a ni a. Traffic nundan mawi tak leh horn pek lohna a nite hi India ram pum ang pawha mite ngaihsan leh sawi zui nasat a ni,” tiin heng kan hmingthatna leh vanneih biknate hi chhawmnung zel turin a chah bawk.

Larsap chuan Mizoram leh India ram chak leh hmuingil din tura inhlan thar leh theuh tura mipuite sawmin, “Tanrualna leh inremna nen kan thil rochun kan ram leh hnam vawnghim zel chungin hmasawnna kawng zawh ila, kum 2047-a India ram intodelh leh mahni kutkea ding thei 'Viksit Bharat' siam turin mahni phak tawkah tha i thawh theuh ang u khai,” a ti bawk.