Kum 2026-2027 chhunga Mizoram Budget cheng vbc. 17,469.92 chu House-ah pharh a ni
Nimin-a Assembly thutkhawm ah hian tan a nih veleh Finance changtu Chief Minister Lalduhoma chu rawn dingchhuakin sawrkar kumthar 2026-2027 atana Mizoram sawrkar Budget hi a pharh a, kum 2026-27 sawrkar kum atana Mizoram sawrkar sum ruahman a pharh tak hi a vaiin cheng vbc. 17,469.92 niin kum 2025-2026 Budget cheng vbc. 15,198.76 aiin cheng vbc. 2,271.16 (14.9%) in a tam zawk a. Kum 2026-2027 Budget-ah sawrkar hnathawk hlawh, pension hlawh, sawrkar inrelbawlna, leiba rulhna etc. (Revenue expenditure) tur chu cheng vbc. 14,094.47 (82.53%) a ni dawn a ni. Kum 2026-2027 hian sum hmuh tura beisei, Receipt Estimate chu cheng vbc. 17,469.91 niin sum hman ral tur beisei, Net Expenditure Estimate chu cheng vbc. 17,076.92 a ni a. Sum hmanral tur Net Expenditure Estimate aiin sum hmuh beisei, Receipt Estimate chu cheng vbc. 392.99 in a tam zawk a, cheng vbc. 392.99 hi leiba tihhniamna atana hman tum a ni. Mizoram Budget cheng vbc. 17,469.92 atang hian cheng vbc. 14,094.47 (82.53%) chu Revenue Expenditure atana hman tur niin, cheng vbc. 2,982.44 (17.46%) chu hmasawnna hnathawhna (Capital Expenditure) atana hman tur a ni a. Kum 2026 -2027 ah chuan Mizoram leiba, Outstanding liability chu cheng vbc. 19,085.15 ni tura chhut a ni bawk.
Budget thar ah hian Central atanga kan sum hmuhna turte chu kan sum hmuhna hnar lian ber Central-a Chhiah tlingkhawm State-in kan insem thin (Central Tax Devolution) atangin cheng vbc. 8,8608.08, Urban Local Body Grant atangin cheng vbc. 49, Rural Local Body Grants atangin cheng vbc. 73, State Disaster Risk Management Fund (SDRMF) atangin cheng vbc. 51.3, CSS atangin cheng vbc. 3,320.15, sawrkar laipui atanga puihna kan dawn tur dangte atangin cheng vbc. 133.04 leh Loan hrang hrang leh sum puk tur atangin cheng vbc 2,454 a ni.
State Own Rax Tevenue (SOTR) atanga beisei zat chu cheng vbc. 1,619.25 niin State-in Chhiah ni chiah lo - Tui bill, Electric bill, State Lottery, ILP Guest House thlen man etc atanga sum a hmuh State Own Non-Tax Revenue (SON-TR) atangin cheng vbc. 1,140.50 leh Housing Advance, sawrkar hnathawk loan rulhna, Cooperative Society Loan - Recovery of Loans and Advances atangin cheng vbc 21.10 te beisei a ni bawk.
Mizoram Budget-a Sum dahna thenkhatte :
* MLA Local Area Development Fund atan cheng vbc. 80. MLA tinin fund cheng vbc. 2 an nei ang
* Bana Kaih (Handholding) Scheme atan cheng vbc. 350 ah a ni a, heta tang hian vbc. 150 chu thlai thar leina tur bik atana dah a ni
* 3rd Mizoram State Finance Commission din a ni dawn a, an hnathawhna atan nuai 100 dah a ni
* State Road Fund Board hnuaiah kawngpui cheithatna atan cheng vbc. 183.25 dah niin, cheng vbc. 45 chu Road Maintenance Cess atanga dah a ni
* State-in hna pawimawh bik a kalpuina tur State Priority Project atan vbc. 100 dah a ni
* MUHCS bill pekna turin cheng vbc 130
* Ruihhlo ngaite enkawlna Home chhawmdawl nan cheng nuai 70 dah a ni
* P&E Department hnuaia power leina atan cheng vbc. 550, power subsidy atan cheng vbc. 175 dah a ni
* Excise & Narcotics Department hnuaia ruihhlo dona atan cheng nuai 40 dah a ni
* Agriculture Department hnuaiah loneitu te'n 50% subsidy-a pipe an leina atan cheng nuai 250 dah a ni
* Central scheme hrang hrang kalpui mek doletna atan cheng vbc 250 dah a ni
Comments
Post a Comment
I ngaihdan i sawi hian mipui ngaihdan i tarlang a ni!