Lenkawl

Kum kalta (2025) chhung khan Serchhip District-ah TB vei mi 52 hmuhchhuah niin tun dinhmunah TB vei enkawllai mi 44 an awm mek.

Tunhnaia Serchhip-a African Swine Fever (ASF) hri hmuhna Chanmari Veng-ah Vawk thi 4 awm tawhin Vawk 7 suat a ni tawh bawk.

Nimin khan Serchhip Bawrhsap hovin Women & Child Development Department leh Serchhip a Line Department te chuan Saksham Anganwadi & Poshan 2.0 atan District Convergence Meeting an nei.

Serchhip District chhunga Police Station hrang hrang ten Case Pending Investigation an neih te chinfel dan tur inkawhhmuhin nimin khan Serchhip SP Office Chamber-ah Crime Review Meeting neih a ni.

Serchhip-a Fire & Emergency Service te chuan nimin khan Govt. JM High School, Serchhip-ah ‘Fire Awareness Campaign & Mock Drill Programme’ an hmang a, he hunah hian Kangmei laka himna te, inven dan tur te, Fire Safety atana tih leh tih loh tur leh kangmei kaihhnawih a hriat tur pawimawh hrang hrang bakah Fire Extinguisher hman dan leh Emergency Rescue Methods te zirtir an ni a. Hei bakah hian Fire Evacuation Mock Drill neihpui an ni bawk.

Nimin khan Kanghmun South Branch YMA te chuan District Hospital Serchhip Blood Bank-a dah turin thisen Unit 42 an pe a, thisen petute hi mipa 26 leh hmeichhia 16 an ni. Heng mi tlawmngai te thisen la tur hian Serchhip Hospital Blood Bank atangin thawktute an kal a, Kanghmun South YMA Hall-ah thisen hi an lak sak a ni.

Gas bur mamawh loh hun a nghahhlelhawm - Malsawmdawngzela Hrahsel

Justice For Marina Group chuan tunhnaia Tanhril nu, Marina Lalchhanchhuahi thihna rap-thlak takah thil felhlel a awm nia an hriat avangin nimin khan Aizawl-ah kawng an zawh.

Students' Self-Support Union (SSU) Ruby Jubilee lawmna leh General Assembly vawi 39-na chu nimin khan Aizawl Vanapa Hall-ah neih niin he hun hmanpuitu Mizoram Larsap General V.K Singh chuan Mizo thalaite chu theihna sang tak nei, ram hmasawnna tura innghahna an nih thu a sawi.

Chief Minister Lalduhoma chuan nimin khan National Cadet Corps (NCC), Mizoram Group Headquarters chu hawngin, Assam State atanga awp thin NCC Mizoram chuan ama pualin Group Headquarters a nei tawh dawn a ni.

Chawngtlai khua in Sapthei an tharchhuah te chu MIFCO in man man zawkin an lei sak dawn.

Mizoram Agricultural Marketing (MAMB), International Fund for Agricultural Development (IFAD) leh Mission Organic Mizoram (MOM) tangkawp chuan nimin khan Aijal Club-ah ‘Private Sector round table on Mizo Ginger cum Buyer Seller Meet 2026’ an buatsaih.

Zo Re-unification Organisation (ZORO) buatsaih Chin-Lushai Conference vawi 134-na chu nimin khan Aizawl-a Lal Thanhawla Auditorium-ah neih niin Assembly Speaker Lalbiakzama chuan khuallian niin a hmanpui.

Unique Identification Authority of India (UIDAI) chuan nimin kian Aadhaar app thar a tlangzarh a, he app thar hi India digital identity kalphunga hmasawnna pawimawh tak niin Union Minister of State for Commerce and Industry, Jitin Prasada-a chuan a tlangzarh a ni. UIDAI tarlan danin, Aadhaar app thar hi tunhmaa an hman thin, mAadhaar app aiin a him zawk a, a chak zawk mai bakah mimal thil vawnhimna kawngah pawh a tha zawk a ni.

India rama sawrkar damdawi In tha bik tehna, National Quality Assurance Standards (NQAS)-ah Kulikawn Hospital chu a tling thar a, heti hian Mizoram chhunga Sub-District Hospital (SDH) pahnih awm zingah National-Level NQAS Certificate nei an awm ta a, Kulikawn SDH hian a tehnaah 94.30% an hmu a ni. Heti hian Mizoram chhunga Sawrkar damdawi In 60 ten NQAS National-Level Certificate an nei mek a. Tunah hian sawrkar damdawi In 11 leh HWC Sub-Centre 45-in State-Level NQAS Certificate nei tawhin National-Level-a endikna tur an dil mek a ni.

Lai Autonomous District Council (LADC) Chief Executive Member (CEM) thar C. Lalsawmzuala chuan nimin khan sawrkar fiahna a paltlang a, United Legislature Party (ULP) hruaitu C. Lalsawmzuala kaihhruai sawrkar fiahna hi nimin khan neih niin MDC 25 zinga 15 te chuan thlawpin MDC 9 in an thlawp lo thung a, sawrkar tharin a mamawh khawp thlawptu a nei a ni. Tarlan tawh angin nikum December thlaa LADC Inthlanpui vawi 12-na ah khan Party mal-a sawrkar siam thei khawpa hnehna chang an awm lo a, hei vang hian MNF leh Congress MDC te chuan United Legislature Party dinin sawrkar an siam theih thu Larsap hnenah an thlen a, sawrkar thar a ding chho tan ta a ni.

Tuirial Branch YMA te chuan nimin khan Bomb hmangin Sangha an man niin a lang a, hemi chungchang hi sawrkar Press Release-ah hetiang hian tarlan a ni :

Serchhip District NCORD chu nimin khan Serchhip DC Meeting Hall-ah thukhawmin NCORD thutkhawm hmasaa thurel bawhzuina te thlirletin, hmachhawp te sawiho a ni bawk.

Serchhip Police te chuan CEIR Portal kaltlanga Phone bo an chhuichhuah paruk (6) chu nimin khan a neitute hnenah an hlan a, heng Phone an chhui zinga pahnih hi Serchhip Darnam Veng-a mi ta rukbo niin pahnih dang chu nikum December thlaa P&E Veng leh Bazar Veng-a mi ta bo a ni a, pahnih dang hi kumin January thlaa New Serchhip College Veng leh P&E Veng-a mi te ta bo niin nimin khan Serchhip Police Station-a OC, Inspr. R. Lalbiakhlua chuan a neitute kutah a hlan a ni.

Mizoram sawrkar-a Vigilance Department changtu Secretary YLN Reddy chuan nimin khan Serchhip District rawn tlawhin DC Office-a Officer te nen an inkawm.

Serchhip District chhung Baktawng leh Chhuanthar khuaa Furniture Workshop ten a chhehvela cheng mipuite hriselna atana harsatna an siam thu report thehluh chungchangah nimin khan Bawrhsap hovin inrawnkhawmna neih a ni.

Mizoram-ah Sairang thlenga Rel a lo luh atangin khualzin an pung nasa hle a, Reiek tlang tlawhtu pawh nasa takin an pung.

Aizawl-a Republic Day lawmna huna Mizoram Journalists’ Association (MJA) te lungawilohna chungchang chu nimin khan sawiho a ni.

Niminpiah khan New Delhi-a Ministry of Home Affairs Office, Kartavya Bhavan-ah Union Home Secretary hovin MHA Official te leh Central YMA hruaitute chu inkawmin Myanmar ramri hung chungchanga Central YMA ngaihdan zawh a ni a, Central YMA hruaitute chuan NGOCC thu ding lai angin ramri hung chuan Zofate inunauna a tihchhiat theih dawn avanga hung rih loh an duh thu sawiin, Mizoram State Assembly pawhin resolution a lo pass tawh thu te; Indo-Bangladesh ramri hungah Mizoram in nasa taka ram a chan dan leh khaw engemawzat hung pawna a awm dan te pawh an sawilang a. Indo-Myanmar ramri hung tura survey neih mek a nih laiin, ramri-a cheng mipui ten ramri hungin a ken tel tur an hriatloh thu leh eng angin nge a nghawng dawn tih inhrilhfiah a awm loh thu Central YMA hruaitute chuan an sawi bawk a ni.

Mizo Zirlai Pawl (MZP) General Hqrs. chuan HSLC leh HSSLC Result bu-a Top-10 tarlan leh anih ngei theih nan ngun taka ngaihtuah nawn turin thuneitute an ngen.

National Startup Day Mizoram Edition lawmna chu nimin khan Aijal Club-ah neih niin he hunah hian Chief Minister Lalduhoma chuan Mizoram-a a hmasa ber ni turin Mizoram-a sumdawnna kalpui mek leh kalpui tumte tan Mizoram Bana Kaih Venture Capital Fund leh Startup Readiness Level of Mizoram a tlangzarh.

Mizoram Food & Allied Industries Corporation Ltd. (MIFCO) Chairman Lalthazuala Rawite chuan Sialhawk khuaa Lakhuihthei thar te MIFCO in lei sak vek tura ruahmanna an siam thu a sawi.

Jal Jeevan Mission (JJM) hnuaia thingtlang khuaa tui lakte enkawl zui dan tur chungchanga ruahmanna siam dan tur sawihona chu niminpiah khan New Delhi-ah neih niin Mizoram atangin PHE Department Minister Prof. Lalnilawma pawh he hunah hian a tel a ni.

Horticulture Minister C. Lalsawivunga chuan Department-te inkarah thawhona tha a awm loh chuan hmasawnna a thuanawp thin tih a sawi.

Mizoram Pradesh Congress Committee (MPCC) Action Committee nimin-a thukhawm chuan tun thla ni 23-a MPCC Executive Committee-in tun thla ni 30-a Mizoram mipuite thlavang hauh tura 'Kawngzawh' neih tura a lo rel tawh chu Aizawl Chanmari atanga Vanapa Hall kawt thleng neih nise an ti a. Kawngzawh neihna chhan tur an tarlan zingah Diklo taka Lengpui Airport bul ram IAF hnena hralh duh lohna lantir te; India ram hmun hrang hranga Kristiante tihduhdahna nasa taka hluar chho zel duhlohna lantirna leh MGNREGA (Ni za inhlawhna) nuai bo duhlohna lantirna te a nih thu an sawi bawk. He kawngzawhah hian Congress Bhavan-a nihna nei zawng zawngte, Block leh Unit-a nihna nei zawng zawngte leh Congress Party mipuite tel vek tura an hriattir thu an sawi bawk a ni.

Lai Autonomous District Council (LADC) Chairman atan South Lungpher Bial MDC atana thlan C. Lalmuanthanga chu thlan a ni. LADC sawrkar thar a pian hnuah nimin khan Protem Chairman C.Hrangthianga'n kaihhruaiin thutkhawm neih a ni a, he hunah hian LADC Chairman thlanna neih niin MNF leh Congress te thawkdun, United Legislature Party atanga Candidate C. Lalmuan-thanga chu Chairman atana thlan niin ani hi LADC Inthlanpui neih zawh takah khan South Lungpher Bial atangin Congress Ticket-a thlantlin a ni a, Chairmana atana thlan a nih hnu hian thutkhawm kaihruai nghalin Chairman thar hi House Leader C.Lalsawmzuala bakah T. Zakunga leh C. Ngunlianchunga ten duhsakna an hlan thu House-ah an sawi a ni. Ruahman lawk ang chuan LADC-a sawrkar thar C. Lalsawmzuala kaihhruai hian thlawptu a ngah tawk leh ngah tawk loh fiahna chu Vawiin hian neih nghal a ni ang.

Tuivawl Bialtu MLA leh MNF Vice President Lalchhandama Ralte chuan a Bial chhunga khaw hrang hrang fang mekin niminpiah khan Mauchar, Palsang leh Zohmun tlawhin nimin khân Zokhawthiang, North Tinghmun, Upper Sakawrdai, North Khawdungsei leh Sakawrdai khua te a tlawh leh a. Khawtlang hruaitu VC te leh NGO hruaitute nen inkawmin zirna a ngaih pawimawh thu a sawi a, Hriselna, inkalpawhna kawng leh khawtlâng mamawh tui lâkna thlengin a hnianghnar chho zel chu lawmawm a tih thu sawiin, hmalâkna tûr tam tak la awmah hmalâk a duh thu te a sawi bawk.

State Information Commissioner Mangjangam Touthang chuan nimin zing khan Lawngtlai Press Club tlawhin Mizoram Journalist Association (MJA) Lawngtlai District-a Member te nen an inkawm a, Sawrkar laipui leh State sawrkarin mipuite tan hamthatna tam tak a duan thin puandarh kawngah MJA ten mawhphurhna sang tak an nei tih sawiin, theihtawp chhuaha hnathawk turin a chah a. MJA te chu palai hna thawktu pawimawh tak an nihna hriaa an hna tha taka thawk tura a fuih bakah RTI Act chu sawrkar khalhngilna pawimawh leh tangkai tak a nih thu a sawi a, mipuite hnena puanzar kawngah thahnem ngaihpui turin a chah bawk.

Parliament Budget Session inpuahchahna atan niminpiah khan sawrkar laipui-a Defence Minister Rajnath Singh hovin Lok Sabha leh Rajya Sabha-a Political Parties Floor Leaders ten New Delhi Parliament House Annexe-a Main Committee Room-ah thutkhawm an nei a, he hunah hian Mizoram Lok Sabha MP Richard Vanlalhmangaiha chu sawm a nih anga telin, nikum Fur lâiin Mizoram châk lakna kawng pawimawh ber a chhiat avangin harsatna nasa tak a thlen thu sawiin, kuminah hian nikum lama Mizoramin harsatna nasa tak a lo tawh ang a thlen tawh lohna turin Fur ruahtui a tlak tak tak hmaa Sairang leh Khamrang kawng te tha taka siam vat vat a nih theih nan sawrkar laipui chu chak lehzuala hma la turin a ngiat thu a sawi a ni.

 

North Vanlaiphai Damdawi Veng-a cheng Richard Lalhmingliana (27) s/o  R. Lalawmpuia chu niminpiah khan Aizawl-ah boralin mi kutthlak vanga boral ni ngeia hriat a ni a, he thihna chungchang ah hian FIR thehlutin pawikhawihtu nia hriat chu Police ten an man tawh.

Nimin khan Serchhip-ah District Water & Sanitation Mission (DWSM) thutkhawm neih niin khaw hrang hranga tui intur sem dan thlirho a ni.

New Serchhip Ruihhlo Do Committee chuan kum 2026-2027 chhunga hruaitu tur inruat tharin Chairman-ah R. Sanghmingthanga; Vice Chairman-ah Zonunsiama, RL.Chhuanawma leh Lalthuamliana; Secretary-ah Lalbiakchama Hrahsel; Jt. Secretary-ah Ramtharmawia leh Lalduhkima Ralte; Treasurer-ah Rualzakhuma leh Fin. Secretary-ah F. Lalhmunthangi te an ruat a. Heng hruaitu tharte hian New Serchhip huamchhunga Kohhran leh NGO zawng zawngte hnenah an Kohhran/Pawl aiawha NSRDC Executive Committee-a thu tur mi pakhat theuh thlangchhuak turin an ngen dawn a ni. NSRDC-ah hian New Serchhip huamchhunga Kohhran pawl hrang hrang, NGO leh Village Council pahnih te an tel a ni.

Integrated Child Protection Service (ICPS) tia hriat thin, Mission Vatsalya hnuaia Serchhip District Sponsorship and Foster Care Approval Committee chu nimin khan District Bawrhsap Paul L. Khuma hovin a Pisa-ah an thukhawm a, kum 2026-2027 chhunga Serchhip District-a naupang chhawmdawl ngai mi 150 te chungchang ngaihtuah niin chhawmdawlna (sponsorship) pek rem tih a ni a, he ruahmanna hnuaiah hian naupang chhawmdawl ngai te hi thla tin Rs. 4000/- pek thin niin naupang te ei leh in, hriselna leh zirna lama an mamawh-a hman tura tih a ni.

School Education Minister Dr. Vanlalthlana chuan Mizoram-a School kai hun- Academic Calendar thlak a nih tur thu sawiin, Class X leh XII Exam Resul bu-ah zirlai titha zualte (Top 10) leh zirlai pass-te Division leh Letter mark hmuh dan tihlan a ni tawh dawn lo.

India rama Public Sector Bank Union pawl lian hrang hrang pakua (9) insuihkawm pawl United Forum of Bank Union (UFBU) te chuan nimin khan India ram pumah lungawi loh an lantir a, Mizoram-ah pawh Bank hnathawktu ten kar khata ni 5 hnathawh phutin lungawihlohna lantirin, Mizoram-a Bank-te pawh khar vek a ni. He Bank Strike hi Indian Bank Association (IBA)-in a lo recommend vek tawh, Bank-te Inrinni zawng zawng chawlh a lo nih theih nana sawrkar an nawrna a ni a. Mizoram-ah pawh Bank hrang hranga thawktu ten thlawpin Aiaawl-a State Bank of India (SBI) Aizawl Main Branch, Zodin Square kawt-ah Bank hnathawk engemaw zat pungkhawmin lungawi lohna an lantir a ni. 

Home Minister K. Sapdanga chuan Mizoram-a raltlan tam tak rei tak awm tawhte enkawlna senso atan sawrkar laipui-ah tanpuina sum an dil thu a sawi.

CSR diltu leh a petute inzawnna tur leh inthlunzawmna tur (CSR Matchmaking) Portal, Mizoram CSR Connect chu nimin khan Chief Minister Lalduhoma chuan hawngin, he portal hian CSR lamah awlsamna tam tak min thlen a beisei thu leh CSR chu langtlang taka kalpui a nih zia hriatna atan he hmalakna hmalakna hi kalpui a nih thu a sawi.

Parliament Budget Session chu Vawiin, January 28, 2026 hian neih tan a ni dawn a, hemi atana inbuatsaihna atana All Parliamentary Floor Leaders Meeting nimin-a neih ah Mizoram Rajya Sabha MP, K. Vanlalvena chuan Mizoram thil pawimawh hrang hrang a tarlang.

Sports & Youth Services Department Minister Lalnghinglova Hmar chuan nimin khan a Pisa-ah tunhnaia India rampum huap inelna a Medal la infiammite lawmpuina hun a buatsaih a, he hunah hian 34th All India GV Mavlankar Shooting Championship-a 25m Centre Fire Pistol (Sr. Master Men Category) a Gold Medal la Lallianmawia, IPS (Rtd.); National Sub-Junior Judo Championship 57 kg (Category)-a Silver Medal la Vanlalramdinpuii leh UTT National Ranking Table Tennis Championships-a Bronze Medal pahnih la Jeho Hlimnakulhpuingheta te hnenah lawmpuina thilpek a hlan a ni.

Mizoram tlawh-a rawn zin mek United Nations Development Programme (UNDP) India-a Resident Representative, Angela Lusigi chu nimin khan Chief Minister Lalduhoma chuan a Pisa-ah kawmin Mizoram a rawn tlawh avanga lawmthu a hrilh bakah UNDP in Mizorama hma an lakna hrang hrangah lawmthu a hrilh a. NITI Aayog Sustainable Development Index report thar bera Mizoram-a District pathumte chu Top Ten-a an lan thu te, Mizoram chu ram ralmuang leh eirukna tlemna a nih thute a hrilh a. Kum 2047 ah Mizoram-in India GDP zaa pakhat tal lo thawhchhuah ve tuma ruahmanna an kalpui thu sawiin, an ruahmanna (vision) a hlawhtlin theih nan Mizoram-a UNDP hmalakna te tilian a ti zau zel turin a ngen a ni.

Ruihhlo a harsatna neite tana Chhanchhuahna Kailawn, Hulhliap-Short Stay Centre chu nimin khan a thawh 7-na atan Neihbawih-ah neih tan a ni leh ta a, Sawrkar, Synod leh Tlawmngai Pawl tangkawp in an buatsaih Hulhliap-Short Stay Centre 7th Batch hi Mipa damdawi a harsatna nei te tan bik a tih anih angin he chanchin buatsaih lai hian mi 242 an lut tawh a, a mamawh ten an hlut zel nia thudawn a ni.

Nimin khan Kolasib-ah District Agriculture Marketing Committee (DAMC) buatsaihin thlai thar lei dan tur chungchangah Secondary Collection Centre (SCC) te hmalak dan tur inhrilhhriatna neih a ni a, he hunah hian sawrkar in February ni 2, 2026 atanga Hmunphiah leh Sawhthing lei a tum thu tarlangin, SCC ten hma an lak dan tur leh thlai thar hralhna kawnga an hmalak dan tur te inhrilhfiah a ni a, sawiho ngai awm te sawiho nghal a ni bawk. Kolasib District-ah hian thlai thar lei turin Secondary Collection Centre (SCC) pathum - Saipum, Thingdawl leh Vairengte-ah te awmin Supervisor, Asst. Supervisor te leh Society hruaitute an tel a ni.

Nikum December 13-a MZU Football Playground bulah hmeichhe ruang, Marina Lalchhanchhuahi (26) tih finfiah tak thih dan chhuina kal zelah kum 62-a upa RL. Peka (62) S/o RL. Dama (L), Tanhril Vengpui, Aizawl chu pawikhawihtu leh mawhphurtu ber a ni tih hmuhchhuah a nih thu Mizoram Police chuan thuchhuah siamin an tarlang a. Police ten he thihna thleng an chhuizuina ah hian Marina-in Phone hmanga a biak hnuhnung ber chu RL. Peka a nih thu te, a Motor-a thisen kai chu Forensic Science & Laboratory-a enfiah a nih hnuah Marina-i thisen ngei a ni tih finfiah a nih thu te tarlan a ni a. RL. Peka hi nikum Dec. 16 khan an In atanga zuangthlain a boral tawh a ni.

Lunglei-a Chapchar Kut hman dan tur relin nimin khan Lunglei District Level Chapchar Kut Celebration Committee chu District Bawrhsap Navneet Mann hovin Lunglei DC Conference Hall-ah an thukhawm a, Chapchar Kut hmanna tur thil tul hrang hrang lo bawhzui turin Organising Committee dinin hruaitu turte pawh an inruat nghal bawk a ni. Kumin hian Chapchar Kut hi ‘Zo nun ze mawi - Inremna’ tih thupui hmangin March ni 13, 2025 khian Lunglei-a C. Thuamluaia Mual-ah hman tura ruahman a ni a, Lunglei District chhung leh pawn lam atanga zaithiam sawm tur lo thlithlai a lo rawt turin Sub-Headquarters YMA kutah mawhphurhna dah a ni a. Kut Thlengtu, Kut Pa, hun hman dan tur chipchiar leh thil tul dang chu Organising Committee kutah dah a ni bawk.

Lai Autonomous District Council (LADC) Sawrkar thara Chief Executive Member (CEM) atan nimin khan Lawngtlai Chandmary Bialtu MDC atana MNF Party atanga thlan C. Lalsawmzuala chu lakluh a ni ta a, Lawngtlai Bawrhsap Donny Lalruatsanga chuan CEM thar hi lalutin CEM thar hian Deputy CEM atan Sanghuliana Mualchin bakah Executive Member atan Lalzahawma Chinzah, HC. Lalengkima leh H. Vanlaltanpuia te ruat an nih thu a puang nghal a, Sawrkar fu ke kim nan chanvo nei tur dang chu remchang dangah la siamfel a nih tur thu a sawi bawk.

 

India Republic Day vawi 77-na chu nimin khan rampum ah urhsun taka lawm a ni a, Serchhip-ah pawh Sports Complex-ah Republitc Day lawmna hi District Bawrhsap Paul L. Khuma hova neih niin Bawrhsap chuan Hnam Puanzar pawtparhin mipuite hnenah thuchah a sawi bawk a ni.

Land Revenue & Settlement Department changtu Minister B. Lalchhanzova chuan District a Settlement Officer in thuneihna a neih ang zawng zawng chu SDO (Civil) in ama huamchhung ah a nei ve dawn tih sawiin, “Vairengte leh Thenzawl-ah bultanin Mizoram puma Civil Sub-Division zawng zawngah kalpui vek a ni dawn a ni,” a ti.

Mizoram Khawpui Fai thlanna neih tur inbuatsaihna atana nikum December thlaa UD&PA Department in Serchhip Town chhunga Village Council Area Fai thlanna a buatsaiha tithate hnenah nimin-a India Republic Day lawmna ah lawmman sem a ni a. Serchhip Town VC Area hrang hrang zinga fai ber lawmman chu Serchhip Vengchung VC ten dawngin Chhiahtlang North VC chu pahnihna an nih bakah New Serchhip North VC chu pathumna an ni bawk.

District Child Protection Unit (DCPU) Serchhip in ‘World Day for Prevention of Child Abuse 2025’ puala Reels Making Competition an buatsaiha tithate hnenah nimin khan lawmman sem a ni a, Lalhriatpuii, East Lungdar chu pakhatna niin C. Vanlalhriatpuii, Serchhip Hmar Veng chu pahnihna leh Zoramthanga Ralte, Serchhip Hmar Veng chu pathumna an ni.

Kumin-a India Republic Day lawmna Serchhip-a neih pualin District Jail, District Hospital, Orphanage Home, Zoar Deprived Children’s Home, Adult Rehabilitation Centre (ARC) Chhiahtlang, Old Age Home, Shakti Sadan, Shalom Special School leh Mercy Hospital-ah te thilpek atan Rs. 2500/- theuh hlan an ni a, heng thilpek te hi District Child Protection Officer hovin tlawm-ngai pawl aiawh ten an hlan a ni.

Serchhip-a India Republic Day lawmna puala Serchhip District Volleyball Association (SDVA) buatsaih ‘Republic Day DC Volleyball Running Trophy’ chu kar kalta chhung khan Chanmari Veng Volleyball Court-ah khelh a ni a. Mipa-ah Team 8 telin Final-ah Vengchung VC chuan Hmar Veng VC chu 3-0 (25-20, 25-19, 25-16) a hnehin an Champion a, Hmeichhia-ah Team 4 telin Final-ah New Serchhip VC chuan Darnam VC chu 3-1 (16-25, 25-20, 25-12, 25-12) a hnehin an Champion bawk. He Tournament-a lawmman te hi nimin-a Republic Day lawmna Serchhip Sports Complex-a neih ah Bawrhsap Paul L. Khuma chuan a sem a ni.

Nimin-a India Republic Day lawmna Serchhip Sports Complex-a neih ah Parade Commander Inspector R. Lalbiakhlua leh 2nd Commander ASI R. Vanlalfinga te kaihhruaina hnuaiah Parade Contingent 13 ten March Past an nei a, heng te hi Un-Armed Contingent 5 leh School Contingent 8 niin Assam Rifles Band Party te an tel bawk a. School Contingent-ah Goodwill English Academy chu pakhatna niin Little Flower Convent School leh Brilliant Higher Secondary School ten an dawt bawk. Un-Armed Contingent-ah Marian High School NCC Air Wing chu pakhatna niin Govt. Serchhip College NCC Air Wing chu pahnihna leh Little Flower Convent School Scouts & Guides te pathumna an ni bawk.

UD&PA Department kaltlangin PMA-Y Housing for All (Urban) hnuaia Insak tanpuina diltu Serchhip, Thenzawl leh North Vanlaiphai atangin mi 1290 ten tanpuina Rs. 1,50,000 theuh an dawng tawh a. Tun thlengin chhungkaw 2244 ten chenna In an nei tawh a ni.

India Republic Day vawi 77-na chu nimin khan Serchhip District-a SDO (Civil) thuthmun ah te pawh urhsun taka hman a ni.

Urban Development & Poverty Alleviation (UD&PA) Department buatsaih Mizoram-a District leh khaw fai inelna lawmman chu nimin khan Mizoram Larsap General V.K Singh chuan a sem a. District puala inelna-ah Municipal la ni lo khawpui 9 te inelin Siaha chu pakhatna niin Saitual leh Khawzawl te chu pahnih leh pathumna an ni a. Champhai, Serchhip, Kolasib, Mamit, Lawngtlai leh Hnahthial ten an dawt bawk a ni.

Nikum chhung khan Mizoram tlawhtu zinmi an pung nasa a, mi 8,41,000 chuang an tling a ni.

Nikum 2025 chhung khan Mizoram-ah kangmei chhuak vangin Rs. 46,08,84,530 hu In leh lo leh bungrua a kang chhia.

Mizoram-a awm mek Myanmar raltlante mitnaute leh kutze thla endik-a chhinchhiah hna kal mekah za zela 90 thelh thawh zawh a ni tawh.

Mizoram Journalist Association (MJA) chuan Aizawl-a Republic Day lawmna a  'Press Enclosure/Gallery' siam a ni lo chu pawi an tih thu an sawi.

Sawrkar laipui thuchhuah angin Mizoram-ah pawh kumin January thla atang khan Retailer-a ePoS leh Digital Weighing Scale hmante chu thlunzawm a ni.

Tun Pathianni kalta-a Phullen Vengthar Pastor Bial KTP Conference chhim tura Luangpawn khua atanga Phullen khaw pan-a kal te chuanna Car pakhat chu Phullen thlen hma Raipuar kawr bulah chesualin kawngthlang ah a tlanliam a, he Motor a chuang mi pahnih ten nunna chanin midang pakhat in hliam a tuar bawk. Thudawn danin he Motor a chuang te hian chawhma Inkhawm banah Luangpawn atangin Phullen khua hi an pan a, he Motor-ah hian mi pathum chuangin motor neitu leh a khalhtu Lalthansanga leh a mi phurh Lallawmsanga te chu a hmunah thiin midang pakhat in hliam a tuar a, an chatsualna hmun hi kham chhengchhe tak niin vanduaina tawk-a boral te hi nimin khan vuiliam an ni.

India Republic Day vawi 77-na denchhenin Nasha Mukt Bharat Abhiyan (NMBA) Saitual District chuan Ruihhlo thatloh zia puanzar nan nimin khan Bike Rally an buatsaih a, Saitual DC Bangla atangin Bawrhsap Dr. Lalngura Tlau chuan vailiamin Keifang, Rulchawm leh Ruallung-ah te kawng an zawh a, Keifang Dawrkawn-ah a kharna hun hman a ni.

Mizoram State Legislative Assembly Budget Session thla thar February 17 tanga neih tur atan inbuatsaihna kalpui zel niin naktuk January 28, 2026 hian Speaker kaihhruai Business Advisory Committee chu an thukhawm dawn a, hetah hian Session hun chhung rei zawng tur leh hun hman dan tur an duang dawn a ni. Tun tuma Assembly thutkhawm neih tur atan hian House chhunga tawngka a chhan chi zawhna (Starred question) 92 lut tawhin, ziaka chhan chi zawhna (Un-Starred question) 12 a lut tawh bawk a, Paper Lay tur pakhat a awm tawh bawkin sawrkar Bill ngaihtuah tur lut erawh ala awm lo nia thudawn a ni bawk.

Kum kalta (2025) January atanga December thla thleng khan Serchhip District-ah nau piang 580 chhinchhiah an ni a, heng te hi mipa 296 leh hmeichhiah 284 te niin hmeichhia aia mipa an tamna hi 12 a ni. Hemi chhung hian mitthi mi 288 chhinchhiah awm bawkin mipa 189 leh hmeichhia 99 te an ni a, hmeichhia aia mipa tamna hi 90 zet a ni thung. Heng nausen piang leh mitthi te hi District Research Officer (DRO) Office chhinchhiah dan a ni a, Serchhip District-ah hian piang leh thi chhinchhiahtu, Registrar of Births and Deaths mi 52 awmin Local Registrar 44 leh Institution Registrar 8 te an ni a, kar kalta Ningani khan heng Registrar te tan hian Serchhip DRO Conference Hall-ah Annual Training neih a ni.

 

Ramchhung hmundangte rualin Zirtawpni kalta, January 23, 2026 khan ‘National Girl Child Day 2026’ chu Serchhip-ah pawh hman a ni a, hmeichhe naupang infiamna lama titha mi 4-te chawimawina hlan an ni.

United Pentecostal Church (UPC) North East India-a Pentecostal Youth Department (PYD) te chuan nimin Pathianni hmang khan Pastor Bial Conference an nei a, Inrinni khan Rorel Inkhawm neiin nizan khan Bial PYD Conference hi a tiak a ni. Serchhip Pastor Bial PYD Conference vawi 50-na chu Serchhip Biak Inpui-ah neih niin Serchhip Dinthar Bial PYD Inkhawmpui chu Darnam Veng-a Ramthar UPC Biak In-ah an nei bawk.

Mizoram Presbyterian Kohhran-a Kristian Thalai Pawl (KTP) Pastor Bial Inkhawmpui chu nimin Pathianni hmang khan Pastor Bial hrang hrangah neih a ni a, Inrinni khan Rorel Inkhawm neiin Bial KTP hruaitu thlanna neih a ni a, nizan khan Bial KTP Inkhawmpui hi a tiak a ni. Serchhip Pastor Bial KTP ten Bial Inkhawmpui hi Serchhip Kawnpui Kohhran Biak In-ah neiin New Serchhip Pastor Bial ten New Serchhip Kohhran Biak In-ah; Serchhip Vengchung Pastor Bial ten Serchhip Vengchung Kohhran Biak In-ah; Chhiah-tlang Pastor Bial KTP ten Chhiahtlang Hmar Veng Kohhran-ah leh Chhiahtlang Kawn Veng Pastor Bial ten Chhiahtlang Kawn Veng Kohhran Biak In-ah Bial KTP Inkhawmpui hi an nei a ni.

Vawiin January 26, 2026 hi India Republic Day a ni a, ramchhung hmun hrang hrangah he ni hi uar leh urhsun taka hman a ni dawn a, sawrkar Pisa chawlh a nih angin sawrkar Pisa leh zirna In te khar a ni ang. Serchhip-ah chuan Sports Complex-ah zing dar 10:00 atangin Bawrhsap Paul L. Khuma hovin hun hman a ni ang.

Nimin-a New Delhi-a National Voters Day hmanna ah Mamit District chuan ‘Best Election District Award’ an dawng a, he chawimawina hi Tlawmngai pawl (Civil Society) te nena thawhhona tha avanga inthlan chhunga Model Code of Conduct (MCC) bawhchhiatna a awmloh avang leh thu diklo thehdarhna kawnga rang taka hma an lakna leh District Election Officer-in Show Cause Notice a hun taka a chhuah thin avangte in an dawng a ni.

Lai Autonomous District Council (LADC)-ah sawrkar a pian mai theih loh avanga tukin dar 5:00 atanga Central Young Lai Association (CYLA)-in Lawngtlai District-a tiamchin awm lova pawnchhuah khap (Total Bandh) huaihawt an tum chu thulh a ni.

Mizorama ruihhlo dona kalpui dan thlirletna hun leh kalpui chhunzawm dan tur sawihona chu Inrinni khan Chief Minister Lalduhoma hovin neih a ni a, he hunaah hian Chief Minister chuan ruihhlo chu hnam hmelma lian ber a nih angin a do kawngah pawh Sawrkar leh khawtlang tanrual a pawimawh thu a sawi a ni.

MNF Party chuan Indian Airforce (IAF) hnena Lengpui ram hralh a nih dan chu CBI chhui tir an phut tih an puang a, ZPM sawrkarin CBI chhuitir an ngam ngei tura an ngaih thu leh an chhuitir lo a nih chuan mantang eitu zingah an tel ngei tihna a nih tur thu an sawi.

Zoram People Movement (ZPM) Thalaite chuan Universal Health Care Scheme thuamchakna tura Sawrkar-in ADB loan a lak tur US Dollar maktaduai 108 chu ZPM kaihhruai Sawrkar hmalakna liau liau a ni tih an sawi.

National Voters’ Day 2026 chu Mizoram hmun hrang hrangah hman niin Aizawl ah pawh Inrinni khan SP Conference Hall-ah ‘My India, My Vote’ tih thupui-a hmangin he ni hi hman a ni.

Mizo Language Development Board hnuaia din Eight Schedules Study Group chuan an Report chu thehluh theihin an peihfel thawkhat tawh.

Mizoram Universal Health Care Scheme (MUHCS) chuan zawmtu neih belh zelin Mizoram sawrkar leh Medanta Hospital te chuan tunhnai khan inremna an ziak a, he inremna hian damlote chu pawisa chawi ngai lova an damdawi In kaltlanga an inenkawl theihna tur a chhawpchhuah sak a, Medanta Hospital hi ramchhung hmun hrang hrang Gurugram, Noida, Lucknow, Patna, Indore, leh Ranchi-ah te a awm a ni. Mizoram State Health Care Society CEO Dr. Lalhriatzuali Ralte chuan Medanta nena an thawkdun tur chu Mizote tan chanchin lawmawm tak a nih thu leh hemi hmang hian Mizoram atanga damlo phai lam kal duh tan harsatna tam tak a chhawk zangkhai ngei a beisei tih a sawi a ni.

Mizoram Milk Producers Cooperation Union Limited (MULCO) leh National Dairy Development Board (NDDB) te chuan Mizoram-a bawnghnute tharchhuah leh sawngbawlna lam tihhmasawnna tur thawhhona thuthlung (Memorandum of Understanding) chu January 22, 2026 khan an ziak a, he thawhhona hnuaiah hian NDDB hian Ministry of Cooperation Flagship Scheme White Revolution 2.0 dung zuiin Mizoram State tan Comprehensive Dairy Development Plan a siam ang a, chumi ti hlawhtling tura Mizoram Milk Producers Cooperation Union Ltd te hmalakna tur duangin, Technical lam leh thil tul tinrengah NDDB hian a thawhpui dawn a ni.

Mizoram sawrkar-a Public Health Engineering (PHE) Department leh Central YMA te chuan kum 2012 atanga thawhdunna an neih tawh hnuah kum hnih (2) chhung atan thawhdunna thuthlung an ziak thar leh ta a, January 23, 2026 khan PHE Department-a Engineer-in-Chief Er. Zodinthari leh Central YMA President R. Lal-ngheta te chuan he thawhdunna thuthlung ah hian hming an ziak a ni. PHE Department leh Central YMA te hian kan ram-a tuihna humhalh leh a awmsa tihpun thupui-ah neiin kum 2012-2025 chhung khan thawhdunna hlawhtling tak an nei tawh a. Kum 2017-2025 chhung khan fai leh thianghlim inzirtirna chungchangah thawhdunna nei lehin he an hmalakna chhunzawm nan hian thawhdunna hi an ziak leh ta a ni.

Tunhnaia Serchhip District chhung Thentlang khuaa Sanghal thi te chu ASF hri an kai ngei tih finfiah a ni tawh .

Thla thar February 9 atanga Serchhip District pum huap ‘Ruihhlo ngaite pual Chhandamna Camping’ neih tur atan inbuatsaihna kalpui zel niin he Camping neihna atana mi tlawmngai te sum leh pai thawhkhawm chu cheng nuai 7 chuang a ni tling tawh.

Kawlphetha Megawatt 24 pechhuak thei tur, Tuirini Small Hydro Electricity Power Plant dinna tur lungphum chu nimin khan Chief Minister Lalduhoma chuan a phum a, he hna hi tha taka thawh a nih theih nan a mawhphurhtute chu duhsakna a hlan a. He hna hi kum nga (5) chhunga zawhfel tura ruahman a ni.

Mizoram sawrkarin hmasawnna leh intodelh tum te puihna atana a duan, Bána Kaih (Handholding) Scheme thawh hnihna (Phase-II) hnuaiah Loan Component Progress Partner atana dilna 386 pawm a ni tawh a; Phase-I hnuaia Progress Partner atana thlan mi 349 hnenah Bank-ten loan an pe tawh.

India sawrkarin ramri (International Land Borders)-a awm khua te thuamchakna tur atana hma a lakna, Vibrant Village Programme zirchianna leh sawihona chu nimin khan Aizawl-a Planning & Programme Implementation Department Conference Hall-ah neih a ni.

Mizoram Youth Commission (MYC) kaltlanga India rampum Lehkhabu Chhiar inelna (Reading Decathlon) a tel School pahnih - Mt Carmel, Chaltlang leh La Montessori, Mission Veng chu 2-na leh 3-na an ni.

Lunglei District-ah hriselna dinhmun enfiahna leh inentirna (Clinical Establishment 59 awm mekin a tam zawk chu mimal ta leh enkawl a ni.

Adviser to Chief Minister TBC. Lalvenchhunga chuan Lengpui ram IAF hnena hralhna cheng VBC. 187.90 dawn chu sawrkar hmasa huna tihfel vek tawh nia sawiin, an sawrkar hnuah zangnadawmna pawisa sawrkar laipui atanga lokal chu an pechhuak tih a sawi.

Nimin khan Ombudsman (Independent Civil bodies for the State of Mizoram) C. Lalthanmawia chuan a Pisa-ah thuthar thehdarhtute kawmin Ombudsman State of Mizoram chu Village leh Local Council te rorel dan leh kalphung bakah an hmalak dana sawiselna leh lungawihlohna te thlenna leh zualkona a nih thu sawiin,  a din tirh kum 2013 atanga nimin thlengin zualko 76 an awm tawh tih a sawi a. Ombudsman hnuaiah hian Village Council leh Local Council inrelbawlna a lungawilohna lut tawh zingah political party anga zualkona a lut hnem ber tih a sawi a, Criminal Case anga kalpui chi lut erawh ala awmlo tih a sawi bawk. Hei bakah hian Ombudsman hian a hnena complaint te chu a chhuifiah nan leh a chinfel nan Court of Civil Procedure, 1908 (Central Act V of 1908) hnuaiah Civil Court power pek a ni tih Ombudsman State of Mizoram chuan sawiin, zualko tawh te hi Village Council hnuaia inrelbawlna chungchang a nih deuh ber thu a sawi bawk.

Mizo Students’ Union (MSU) General Hqrs. hruaitute chuan Mizoram-a dan lova khaw din titawp tura sawrkar an ngenna chungchang ah hmalakna a awm rih loh thu leh an ngaihchan mek thu an sawi a. Kum liam ta ah khan Mizoram-ah dan lova khaw din 11 a awm tih RTI hmangin an hmuhchhuak nia sawiin, heng khua te hi nikum vek December ni 10 khan a kaihhnawih Department hotute nen a hmunah tlawhin kawng hrang hranga an dinhmun an lo zirchiang tawh niin an sawi a. Dan lova khaw din te chu kum kalta chhung ngeia thiaha tihtawp a nih theih nan Mizoram Sawrkar chu hma la turin ngen mah se, tun dinhmunah Un-Authorised Village-te chungchang ah hmalakna a awm loh thu MSU hruaitute chuan an sawi a, hunpui chawlh an hman avanga mumal taka an bawhzui theih rih loh thu leh dan anga pisa an hawn veleh chak zawka Mizoram Sawrkar an nawr zui tur thu an sawi bawk.

MNF Party chuan nimin khan Aizawl-a Mizo Hnam Run-ah Chhung Inkhawm neiin he huna thu sawitu Minister hlui R. Lalzirliana chuan ZPM ten hma an lak ve na lianthiam deuh chu MNF sawrkar hunlaia bul lo tan tawh, engkim lo ruahmansa vek tawh a ni zel niin a sawi.

BJP Mizoram State Vice President Vanupa Zathang chuan Aizawl Municipal Corporation (AMC) inthlan lo awm tur hian Mizoram hmalam hun thui tak a hril thei dawn nia sawiin, BJP-te pawh in Candidate tha tak tak an neih dawn thu nimin khan an Party Office-ah a sawi.

Serchhip-a Excise & Narcotics Department chuan kum kalta 2025 chhung khan Zu leh ruihhlo thahnem tak manin sawrkar-ah Chhiah tam tham tak an chhunglut bawk.

Mi 128 tan theihna District Jail Serchhip-ah nimin (Jan. 18, 2026) thleng khan tang mi 79 an awm mek a, mipa 68 leh hmeichhia 10 bakah nu te an tan avanga tang ve naupang pakhat te an ni. Serchhip District Jail-a tang mek mi 79 zinga mi 37 te chu an thubuai ngaihtuah lai niin heng ter hi mipa 29 leh hmeichhia 8 an ni a, an thubuai ngaihtuah tawh leh an thubuai-a thiamloh chantir an nih avanga tang mi 41 awmin mipa 39 leh hmei-chhia pahnih an ni.

Sairang Rel Station hawn anih hnuah phai lama zin chhuak khualzin an tam bakah State pawn atanga khualzin Mizoram tlawhtu an pung nasa hle a. Mizoram tlawhtu an pun nasat vangin anmahni hruaikualtu tur (tour operator) indaihlohna leh mamawhna a sang hle niin Tourism Department chuan an sawi.

Kum 2028-a Mizoram puma Electric Smart Meter vuah hman turin Aizawl khawpui chhungah Smart Meter 6454 vuah a ni tawh.

Mizoram Rajya Sabha MP K. Vanlalvena chuan kar kalta Ningani leh Zirtawpni khan Thingsai-Bualpui-Saisihchhuah-Pangkhua-Sangau (TBSPS) Kawngpui sial mek leh Tuipui D-a Lei (bridge) thar siam tur chu a hmunah kalin a enfiah.

District Council & Minority Affairs Minister C. Lalsawivunga chuan, “Kan sawrkar tan tirh kum 2024 khan Autonomous District Council ten Direct Funding an hmuh theihna tur leh Anti-Defection Law a awm theihna turin rawtna (recommentdation) kan thlen tawh a ni,” a ti.

Champhai Joint NGOs - Sub-Hqrs.YMA, MHIP, MUP leh MZP Hqrs. chuan Champhai a zirna sang zawk dah turin sawrkar nawr an tum tih an sawi.

Aizawl khawpuia Assam Rifles luah thin ramah mi 113 in LSC an nei a, an zinga mi 13 in an LSC sawrkarah an pe lut tawh.

Nikum (2025) chhung khan Mizoram hmun hrang hranga Helicopter Service, Pawan Hans Helicopter-ah passenger 7247 an awm a. Mizoram sawrkar-a Civil Aviation thawktute chuan Helicopter Service chu mipuiin an chhawr tangkai hle tih an sawi.

Mizoram Sawrkar chuan Mizoram Universal Health Care Scheme (MUHCS) hmangtu damlo te enkawlna senso atan cheng vbc. 115.29 a pe tawh a. MUHCS kalpuitu damdawi In te hnenah January ni 16 khan MUHCS Bill cheng vbc. 2.77 pek leh niin MUHCS kalpui a nih tan April ni 1, 2025 atanga January ni 16 thleng khan Mizoram Health Care Society chuan MUHCS kalpuitu damdawi In te hnenah damlo enkawlna senso cheng vbc. 115.29 a pe tawh a, heng hi damlo 68,022 enkawlna bill a ni.

Aizawl khawpui chhung kawngpui thawm-that hna thawh mêk chu Inrinni zan khan ZPM General Hqrs. hruaitute chuan Vice President C. Lalnunnema hovin an tlawh.

Kumin January 9 tlai-a Sihphir Neihbawih-a quarry chim in a delh Samal Chakma ruang chu nimin chawhnu dar 2:30 vel khan hmuh a ni a, heti hian he vanduaina thlenga thi te ruang chu hmuh kim a ni ta nia hriat a ni. He quarry chim in a delh te zawn hna hi vanduaina thlen zan atang hian ngawrh taka thaw a ni a, Mizo dan-a ni 7 chhung zawn a nih hnuah Zirtawpni khan khawtlang huapa zawnna chu tihtawp a ni a, amaherawh chu a zawn hna erawh thawh zui zel niin nimin khan ruang hi hmuh leh a ni ta a ni. He vanduaina thleng ah hian quarry chim hian mi 4 delhin mi pahnih chu quarry chim ni hian hmuh nghal an ni a, pakhat chu dam-dawi In-ah enkawl mek niin pakhat zawk, Muana tia hriat, Manipur lam mi chu a boral a, hemi hnu Nilaini kalta khan Solen Tudu-a ruang hmuh niin nimin khan Samal Chakma ruang hmuh a ni leh ta a ni.

Kristian Thalai Pawl (KTP) General Conference 2026 lo awm tur puala siam Mobile Application chu Inrinni (Jan. 17, 2026) khan Saitual Prebyterian Kohhran Centenary Hall-ah tlangzarh a ni a. App hi Siruk Consultancy in inkhawmpui puala an siam a ni.

Kum 2020 atanga nikum (2025) thleng khan Mizoram-ah kumtin lirthei 29,406 awm belh ziah ang a ni. Transport Department chhinchhiah danin kum 2020 khan Mizoram-ah lirthei 2,07,885 awmin, kum 2021-ah lirthei 2,33,639 a awm a, kum 2022-ah 2,55,877 awmin kum 2023-ah 2,83,020 a awm a, kum 2024-ah 3,09,832-ah kai chhoin nikum khan Mizoram-ah lirthei 3,54,914 a awm anga chhinchhiah a ni a, lirthei punna hi kum tin lirthei 29,406 vel ang nia chhut a ni.

Mizoram State Animal (Saza) kah avanga man K. Lalramhluna Zobawk Bazar, Lunglei leh Sanghal Sarep a zawrh avanga man Mausen khuaa Lalnunpuii te chu ni 13 chhung tang turin Court chuan an chungthu a rel sak a. Lalnunpuii hi nikum khan ramsa rep zawrh avanga man ni tawhin ti tawh lo tura a intiam avangin thubuai siam sak a ni lo a, amaherawh chu a sarep zuar chu man leh niin Wildlife (Protection) Act hmangin thubuai siam sak a ni ta a ni.

Mizoram-ah ni 122 chhung zet COVID-19 kai hmuhchhuah an awm tawh lo a, nikum Sept. 16-a COVID-19 hri kai hmuhchhuah hnuah he hri kai hmuhchhuah hi an awm tawh lo a ni. ISDP chhinchhiah danin nikum (2025) chhung khan Mizoram-ah COVID-19 hri kai hmuhchhuah mi 40 awmin hri kai hmuhchhuah zingah hian na tak an awm lo a, kum hmasa 2024 khan hri kai mi 73 hmuhchhuah ni bawkin COVID-19 hian min awmchilh avangin kai thar hi awm zeuh zeuh tura ngaih a nih thu an sawi bawk.

Nimin khan New Delhi-ah sawrkar laipui hmalakna zinga mi PM Vishwakarma Haat 2026 chu hman a ni a, he hunah hian Mizoram atangin mi pathum, mahni kutkawih thiamna hmanga thil siamchhuah zuar chhuak Lalmuanpuii (Kawnpui), C. Lalfakzuali (Aizawl District) leh R. Lalremhlamawii (Lunglei District) te an tel a, an kutkawih thiamna hmanga an siamchhuah te an zuar a ni. PM Vishwakarma Haat 2026-ah hian India ram State leh UT hrang hrang atangin mi 117 zetin an thilsiam te an phochhuak a. January ni 18, 2026 atanga January ni 31 thleng chawhma dar 10:30 atanga zan dar 10:00 thleng neih a ni ang.

Tunhnai kum nga chhungin Mizoram-a pian punna rate a pung chho a, nau piang pawh an tam chho hret hret. Economics & Statistics Department-in nikum kum tawp lama 'Annual report of Registration of Births & Deaths Mizoram, 2024' a tihchhuah atanga a lan danin Mizorama nau piang punna rate hi tun kum 5 kalta, kum 2020 atanga kum 2024 thleng khan kum tin a pung chho hret hret zel a. Piang punna 'birth rate' hi kum 2020-ah 17.28, kum 2021-ah 17.63, kum 2022-ah 18.49, kum 2023-ah 18.89 leh kum 2024-ah 20.11 te a ni. Report atanga a lan danin kum 2020 khan Mizoram-ah naupiang 23320 an awm a, kum 2021-ah 24314, kum 2022-ah 26049, kum 2023-ah 27180 leh kum 2024-ah piang 29615 an awm a ni.

Sawrkar Laipui Ministry of Development of North Eastern Region (DoNER)-a Secretary Chanchal Kumar IAS chuan nimin khan Serchhip District rawn tlawhin Serchhip Kawlri tlang-a Cultural Heritage Centre sak mek a tlawh a, he hna hi kumin kumtir lamah zawhfel tura ruahman a ni.

Serchhip District rawn tlawh mektu sawrkar laipui Ministry of DoNER Secretary Chanchal Kumar chuan nimin khan Thenzawl tlawhin Vawiin hian Mizoram hmundang a tlawh leh ang.