END ten nikum chhungin Zu leh ruihhlo an man tam

Serchhip-a Excise & Narcotics Department chuan kum kalta 2025 chhung khan Zu leh ruihhlo thahnem tak manin sawrkar-ah Chhiah tam tham tak an chhunglut bawk.
Serchhip-a Asst. Commissioner of END Office atanga LENKAWL in thu a dawn danin kum kalta 2025 chhung khan Serchhip-a Excise & Narcotics Department hian Rakzu litre 3356.8 zet manin hei hi Rs. 6,71,360/- man nia chhut a ni a, Zu bilhlai Tin 1586 manin Sapzu um puitling (750ml) 53 an man a, hei hi Rs. 39,750/- man nia chhut niin a chanve um pakhat an man a, Beer (canned) 93 manin hei hi Rs. 46,500/- man nia chhut a ni bawk. Heng bakah hian Zu siamna bel 124 zet an man bawk a ni.

Nikum chhung vek khan Serchhip-a END te hian Heroin gram 657.85 manin hei hi Rs. 20,05,127/- man nia chhut a ni a, Ganja kg. 2.427 manin ruihna atana hman chi khuh damdawi engemaw zat an man bawk a, heng Zu leh ruihhlo kaihhnawih ah hian lirthei (LMV) pasarih manin Two Wheeler pakhat an man bawk.

Kum 2025 chhung khan Serchhip END te hian ND&PS Act hnuaiah thubuai 29 ziaklutin mi 28 an man a, Mizoram-a Zu khapna Dan, MLP Act hnuaiah thubuai 257 ziaklutin mi 250 an man bawk a. Foreign Liquor & Spirit atangin Chhiah Rs. 16,45,468/- hmuh niin Fines & Confiscation hnuaiah Rs. 2,21,000/- an hmu bawk.