MOM enkawl FPC kokhawm

Organic Mizoram (MOM) enkawl Farmers Producer Company zinga Organic Ginger (Sawhthing), Organic Mizo Chilli (Mizo Hmarcha) leh Organic Turmeric (Aieng) chingtu FPC-te chu niminpiah khan IWRD Auditorium, Aizawl-ah kokhawm niin an thlai tharchhuah hralhna kawnga hmalak zui dan tur sawiho a ni a. He hun hi Adviser to Chief Minister Dr. KC Lalmalsawmzauva chuan hmanpuiin loineitute zingah sawrkar puihna dawn chhunga nung, sawrkar atanga puihna a tawp ruala tawp ve mai an awm thin chu a that loh thu sawiin, mahni ke-a ding thei tura hmalak a tul thu te a sawi bawk.

Kum 2016 khan Mission Organic Value Chain Development for North Eastern Region (MOVCD-NER) Scheme kaltlangin Mizoram-ah Mission Organic Mizoram (MOM) hi Agriculture & Farmers Welfare Department hnuaiah din a ni a. Tunah hian District hrang hrangah Mission Organic Mizoram (MOM) hnuaia loneitute tan hmalakna kalpui mek zel niin, tehfung khauh tak nen Organic Certificate pekchhuah thin a ni a. Organic thlai chingtute tan kawng hrang hranga hmalak mek zel a ni.

MOM hnuaiah hian Phase 4-na kalpui mek niin, FPC (Farmers Producer Company) 41 an awm mek a, Organic Farmer 27,604 ten ram hectare 26,500-a zau neiin Mizorama District hrang hrangah Bawrhsap te kaihhruaina hnuaiah District Level Monitoring Committee (DLMC) din a ni a, anni kaihhruaina hnuaiah hian Organic thlai chingtute hmalakna leh hmasawn zel dan turte enho a, ngaihtuah zui thin a ni. Thlai thar chhuahte seng leh sawngbawlna kawnga pui tura hmalakna atan Post Harvest Infarstructure (FPC) te ngaihtuahpui an ni a. Chung atan chuan Collection Centre 26 din ni tawhin, Integrated Pack House 15, Small Processing Unit pakhat (1) leh Transport Vehicle 11 pekchhuah a ni tawh bawk.