Raltlan te enkawlna senso tanpuina dil leh mek

Home Minister K. Sapdanga chuan Mizoram-a raltlan tam tak rei tak awm tawhte enkawlna senso atan sawrkar laipui-ah tanpuina sum an dil thu a sawi.

Akashvani Aizawl News a hrilh danin Home Minister K. Sapdanga chuan raltlante tanpuina atan hian Central sawrkarah cheng vbc. 5 an dil mek thu leh buaipui mek a nih thu a sawi a. An sawrkar hnuah Central sawrkar chuan raltlante chhawmdawlna atan hian buhfai cheng vbc. 5 hu leh a pawisa-in cheng vbc. 5 a rawn pek tawh thu a sawi a. An cham rei tawh chungin Mizoram mipuite’n harsa takin an la chhawmdawl hram hram thei niin a sawi a, eng chen nge an chhawmdawl zui theih ang tih chu hriat a harsat thu leh Central sawrkar tanpuina an mamawh thu a sawi a ni.

Tun dinhmun hnuhnung berah Myanmar raltlan hi Mizoram-ah mi 28,964 an awm mek a, Raltlan awm zat hi a danglam reng a, lo luh belh an awm zeuh thin rualin an awm thinna a ralmuan deuh chuan an kir leh a. Thenkhat erawh Mizoram ramri hnaiha awmte chu an leilet leh thlawhhma-ah te an han thawk leh thin bawk a, chuvangin awm zat hi a danglam reng a ni. Hetihlai hian Bangladesh Chittagong Hill Tracts atanga rawn raltlan zat chu a danglam nasa ngai lova, tunah hian mi 2,360 an awm mek a, an awm tamna ber Lawngtlai district-ah mi 2,042 an awm mek a ni.