MZP in Result Bu-ah Top-10 tarlan an duh

Mizo Zirlai Pawl (MZP) General Hqrs. chuan HSLC leh HSSLC Result bu-a Top-10 tarlan leh anih ngei theih nan ngun taka ngaihtuah nawn turin thuneitute an ngen.

MZP General Hqrs. hian nimin khan Aizawl a MZP Pisa-ah Executive Committee thutkhawm neiin Mizoram sawrkarin HSLC leh HSSLC Top-10 te Result bu-ah Session thar 2026-2027 atanga tarlan a nih tawh loh tur thu a sawi chu ngaihtuahin, Zirlaite leh zirna In inkarah inelna thianghlim zawk a awm zel theihna turin HSLC leh HSSLC-ah Top-10 tarlan leh anih ngei theih nan thuneitute chu ngun taka ngaihtuah nawn turin an ngen a. Zirna In leh zirlaite inkarah thiamna tak tak a lanchhuah theihna turin result bu-a tarlan loh ngawt aiin, Exam pattern leh Question siam dan chu ngun taka ennawn zawk turin thuneitute a ngen a ni.

Hei bakah hian MZP chuan tunhnaia Mizoram University Finance Officer lak chungchang pawh ngaihtuahin, kan State a zirna In sang berah dan palzutna tam tak awma hnalak a ni chu MZP chuan hriatthiam har a tih thu leh hetiang thil hi a thlen nawn tawh lohna tur leh MZU zahawmna humhim a nih theihna tura a tul anga hmalak an rel a. Hei bakah hian Mizoram-a Central Institution hrang hrangte chu dan dik taka hnalak kalpui thin tura ngenin an hriattir a ni. Forest Conservation Amendment Act, 2023 (FCAA) chungchang pawh MZP chuan sawiho in, Study Group zirchianna atanga sawiho a nih hnuin he dan hi Mizoram leh hnam tana thalo leh kan hnam kal zel tur atana himlo a nih avangin tha an ti lo tih an sawi a. Mizoram Assembly in he Dan hman theiha alo passed tawh chu sut leh ngei turin thuneitute an ngen bawk.