MP (RS) in kawng sial mek leh Lei dawh tur a tlawh

Mizoram Rajya Sabha MP K. Vanlalvena chuan kar kalta Ningani leh Zirtawpni khan Thingsai-Bualpui-Saisihchhuah-Pangkhua-Sangau (TBSPS) Kawngpui sial mek leh Tuipui D-a Lei (bridge) thar siam tur chu a hmunah kalin a enfiah.

Indo-Myanmar Border Road siam mek Hnahthial District-a Bualpui H leh Lawngtlai District-a Pangkhua te inkar hna thawktu BRO ten Compensation harsatna chhuanlam avanga kum 2021 atanga 2023 inkar chhung hnathawh an chawlhsan chu Central sawrkar hotute hnenah hna thawk chhunzawm thuai tura a lo ngen thin tawh avanga hna chhunzawm a nih leh tak thu Rajya Sabha MP K. Vanlalvena chuan sawiin, a hmun ah kalin a enfiah a. Pangkhua atanga Saisihchhuah, Myanmar Border road laihna tur atana DONER Ministry in kum 2021-a cheng vbc. 66 a lo sanction tawh BRO ten hna an thawh loh avanga DONER Ministry in pawisa sanction tawhsa a hnuh kir vek hnuah sawrkar laipui-a Ministry of Defence in Hnahthial District Bualpui H lam atanga kawngpui sial hna kum 2024 tawp lam atanga an lo chhunzawm leh thei ta chu lawmawm a tih thu Rajya Sabha MP chuan a sawi a ni.

Rajya Sabha MP hoan Bualpui H atanga Tiau leh Chhimtuipui infinna bul thlenga Border road laih mek chu a hmunah tlawh in, Pangkhaw ram leh Bualpui H ram dawh zawmtu tur Chhimtuipui lui chunga Lei (Bridge) siam tur ban phunna lai turte BRO EE te nen an en ho nghal bawk a ni.

Hemi hnu hian Hnahthial bul Darzo kai Tupui D-a motor lian zawh theih tur Bridge siam tur ban phunna lai tur pawh hnathawktu ABCI Infrastructure General Manager te nen an en ho nghal bawk a. Tuipui D-a motor lian zawh theih tur Lei (bridge) siam tur hian Director General of BRO chu Delhia a Office-ah K. Vanlalvena chuan tum thum a lo lenchilh tawh a ni. Tunhnaia Chhimtuipui chunga Lei dawh tur pahnih te hi meter 150 leh meter 255-a sei te an ni a. Cheng vbc. 25 leh vbc. 75 te senga dawh tura ruahman an ni a. September 2027-ah dawh zawh hman tura ruahman an nih thu BRO EE te leh ABCI General Manager te chuan Rajya Sabha MP K. Vanlalvena chu an hrilh a ni.

He huna BRO EE ten Rajya Sabha MP an hrilh danin Pangkhua lam atanga Saisihchhuah panna tur kawngpui sial hna chu Compensation pek zawhfel hnuah tan tura ruahhman a nih thu leh Pangkhua a compensation pek tur te chu tun atanga thla hnih chhunga pek fel vek an tum thu an sawi a. Thingsai leh Bualpui H inkara blacktop loh border road KM hnih a thui la awm chu a ngaimawhawm thu leh kumin Fur ruahtui tlak hma ngeia boulder phah hman ngei a tul thu MP chuan BRO hotute hnenah a thlen nghal a. BRO hotute chuan khawtlang hruaitute nen tangrualin an tih ngei tur thu an lo hrilh nghal bawk a ni.