IAF hnena ram hralhna chungchang sawifiah

Adviser to Chief Minister TBC. Lalvenchhunga chuan Lengpui ram IAF hnena hralhna cheng VBC. 187.90 dawn chu sawrkar hmasa huna tihfel vek tawh nia sawiin, an sawrkar hnuah zangnadawmna pawisa sawrkar laipui atanga lokal chu an pechhuak tih a sawi.

    ZPM Party in nimin-a Chhung Inkhawm an neih ah Adviser to Chief Minister, TBC. Lalvenchhunga chuan nimin-a Vanglaini chanchinbu-a Senior Journalist HC. Vanlalruata thu ziah, 'Lengpui Ram IAF Hnena Hralh' a lo lang zang-nadawmna cheng vbc. 187.90 dawn chungchang chu sawrkar hmasa huna tihfel vek a ni tih sawiin, IAF ram lei leh hralh hi Lengpui ram chauh ni lovin Sihphir ram acre 5 a tel tih a sawi a. “He thil hi kan sawrkar hma thil a ni a, Assembly House leh Ignite Studio-a party tin te sawihonaah ka sawi chhuak tawh bawk. Sawrkar hmasa huna teh fel leh tih fel vek tawh a ni,” tiin tun sawrkar hunah zangnadawmna pawisa hi sawrkar laipui lam atangin a lo thlen thu leh pek a nih thu a sawi bawk. Sawrkar hnen thleng lo a ram hralh theihna DC 'Level'-a a zo vek thei chu mak a tih thu pawh sawiin, “Ram hi 'direct'-in an lei a, sawrkar thleng lo a DC 'level'-ah a zo vek mai a, tun IAF ram leiah pawh hian DC 'level'-ah a tawp vek. 'Direct purchase' a ni a, DC hian Collector an nih avanga 'final' mai an ni a, cheng vbc. 187.90 khan an hralh thei tlat a ni,” a ti bawk.