Serchhip District-ah ASF vangin Vawk 4 a thi tawh

Tunhnaia Serchhip-a African Swine Fever (ASF) hri hmuhna Chanmari Veng-ah Vawk thi 4 awm tawhin Vawk 7 suat a ni tawh bawk.
Tunhnai khan Serchhip District-a Thentlang ram ah Sanghal thi engemaw zat hmuh a ni a, heng te hi AH&Vety Department-a mithiam ten an enfiah hnuah Vawk hri, African Swine Fever (ASF) an kai ngei tih hmuhchhuah a ni a. Hemi rual hian tunhnai khan Serchhip Chanmari Veng-ah Vawk thi awm lehin heng te hi enfiah a nih hnuah ASF an kai tih hmuh leh a ni bawk a, nimin thleng khan Chanmari Veng ah hin ASF vangin Vawk pali thi tawhin 7 suat a ni tawh bawk a ni.

Hetianga Serchhip District-a ASF hri hmuh leh a nih avang hian Serchhip District Magistrate Paul L. Khuma chuan Serchhip District chhunga ASF hri hi a darh zel loh nan Section 163 of Bharatiya Nagarik Suraksha Sanhita, 2023 tlawhchhanin tun thla ni 20 khan thupek a tichhuak a. He thupek ah hian Serchhip District chhungah ramdang (Foreign countries), State dang leh District dang atangin Vawk, Vawksa leh Vawksa atanga siam thil reng reng lakluh leh thawnchhuah khap a nih thu te; Serchhip District chhunga khua leh khua, Veng leh Veng te Vawk inlakpawlh khap tlat a nih thu te; Vawk damlo reng reng talh leh hralh khap tlat a nih thu leh Vawk damlo chu dah hran vat tur a nih thu te tarlangin, Vawk damlo leh thi reng reng chu AH & Vety Department thawktu te hnenah hriattir vat tur a nih thu leh Vawk thi reng reng uluk takin Disinfectant nen thuk taka phumbo tur a nih thu te a tarlang a. He thupek hian thla hnih (2) chhung a huam tur thu leh thupek zawm lo chu Section 223 of Bharatiya Naya Sanhita, 2023 dan hmangin hrem theih an nih tur thu te pawh a tarlang bawk.

Serchhip District-ah hian nikum chhung khan ASF vanga Vawk thi leh suat chhinchhiah awm lovin kumin-a ASF thawh lina ah erawh Vawk thi awm hmasakna ber a ni ta a, hri leng laka fimkhur turin mipuite chu thuneitu ten an chah bawk a ni.