Kawlphetha MW 24 pechhuak thei tur Tuirini SHE Power Plant lungphum phum a ni

Kawlphetha Megawatt 24 pechhuak thei tur, Tuirini Small Hydro Electricity Power Plant dinna tur lungphum chu nimin khan Chief Minister Lalduhoma chuan a phum a, he hna hi tha taka thawh a nih theih nan a mawhphurhtute chu duhsakna a hlan a. He hna hi kum nga (5) chhunga zawhfel tura ruahman a ni.
Tuirini Small Hydro Electricity Power Plant dinna tur lungphum phumna hun Tuirini kam-a neih ah hian Chief Minister Lalduhoma chuan Power siamchhuahna lama hma kan sawn theih nan Power Minister leh P&E Department-a thawktute inpekna a sang em em tih sawiin, “Thla hmasa lawk khan Thenzawl Solar Power Plant, Megawatt 10 pechhuak thei kan hawng a, Sumsuih-ah Megawatt 5 pechhuak thei tur Solar Plant kan thawk mek bawk a, hna zaa 20 kan thawk tawh a. Thenzawl leh Sumsuih Solar Plant hi Mizoram ta liau liau a ni. Tunah 24 Mw Tuirini lungphum kan han phum leh a, 132 Mw Tuivai pawh chak taka bawhzui zel a ni,” a ti a. Tuivai Hydro Electric Project hi Central Water Commission (CWC) in 210 MW tharchhuak thei tura a duh thu leh tuikhuah in Manipur State hmun thenkhat a chim dawn avangin tihtet deuh thaa an hriat thu sawiin, “MW 132 tharchhuak turin ruahmanna kan siam a. Department of Economic Affairs, Ministry of Finance-in DPR te siamtha a, Private Developer tha thlang a, Tender chhuah a, State sawrkarin Agreement kan sign pui thlenga kan buaipuina tur - Transaction Adviser ruatna atan cheng vbc. 2.3 min rawn pe a. Khawvel huapa firm tha leh lar, Ernst & Young LLP te chu kan thawhpui ta a. Tunah hian DPR hi peihfel a ni tawh,” a ti.

Tlawng Hydel Project tur pawh DPR ennawn mek a nih thu Chief Minister chuan sawiin, leilung chhungril zirchianna Drifting Work chu M/S Benjamin Lalparmawia, Hlimen hnenah January 3, 2023 khan Work Order pek niin Tlawng Hydel Project DPR hi September 2026-ah zawhfel hman beisei a ni tih a sawi a. Tualchhunga Solar Power tharchhuah tihpun nan Private developer-ten Solar Plant hmun 5-a an siamna tur Expression of Interest (EOI) chhuah niin reiloteah a thawktu tur thlanfel a nih tur thu te; Rooftop Solar pawh 791 installation bun fel tawh niin heng atanga power tharchhuah (installed capacity) zawng zawng chu MW 2.62 lai a nih thu leh Vankal Solar Park bul Tuichang lui-ah Pump Storage Project tur buaipui mek a nih thu te pawh Chief Minister chuan a sawi bawk a ni.

Tuirini Small Hydro Electricity Power Plant hi Externally Aided Project (EAP) sum hmanga cheng vbc. 676.98 senga thawh tur niin New Development Bank, Sanghai atanga Loan cheng vbc. 676.98 hmanga thawh tur a ni a. P&E Department chuan February 5, 2024 khan Externally Aided Project (EAP) hnuaia thun turin State sawrkarah Proposal a thehlut a, State Level Screening Committee chuan April 4, 2024 khan pawmin Department of External Affairs (DEA) Screening Committee chuan February 28, 2025 khan External Funding turin a rawn pawm ta a ni.

He hna hi New Development Bank-in a funding tura tih a ni a, Project Cost za zela 80 (80%) chu Loan angin NDB atangin lak a ni anga, Central sawrkarin a rul ang a. Project Cost atanga 20% chu State sawrkar tum ve tur niin Total cost of Project chu cheng vbc. 676.98 a ni a. Kum nga (5) chhunga thawh zawh tura ruahman a ni.

Nimin-a lungphum phumna hunah hian Khualzahawm Home Minister K. Sapdanga pawhin hun reilote chhunga hmasawnna duhawm tak tak kan hmu chho mawlh mawlh chu an lawm hle tih sawiin, “Vawiin-a a lung kan phum Tuirini hi a puitlin hunah chuan Mizoram in kan puala kan neih len ber a ni dawn a, a hlu hle a ni,” a ti a. ani bakah hian P&E Department-a E-in-C Er. JH. Malsawma leh Er. C. Ropianga, Project Director, Tuirini PMU te pawhin thu an sawi bawk a ni.