Mizoram-a Electric Smart Meter vuah turah Aizawl-ah 6454 vuah a ni tawh

Kum 2028-a Mizoram puma Electric Smart Meter vuah hman turin Aizawl khawpui chhungah Smart Meter 6454 vuah a ni tawh.
Power & Electricity Department-a Superintending Engineer (SE) pahnih Lalrinmawia leh Zothansanga te thuthar thehdarhtu ten Smart Meter leh Electric Billing System chungchanga an kawmnaah he thu hi sawiin, sawrkar laipui hmalakna hnuaiah Smart Meter chu India ram pumah Electric Bill pek that loh avanga hloh tam lutuk tih tlemna atana ruahman a ni tih sawiin, tun dinhmunah Aizawl khawpui chhungah chauh la vuah rih niin 6454 vuah a nih tawh thu an sawi a. Smart Meter vuah hna hi Contractor in kum 10 chhung a enkawl dawn a, tun dinhmuna a hlui thlak runpui an neih mek hi kum 2028 hmain Mizoram pumah zawhfel hman tum a nih thu an sawi a. Smart Meter vuah kim hunah chuan Office atangin reading an lak vek theih tawh dawn avangin Electric bill dik zawk a awm thei dawn a, Electric bill pre-paid a an kalpui hunah phei chuan mi zawng zawngin bill an pek a ngai tawh dawn a, bill pe tha lo leh bill ba te awm tawh dawn lo a, hmasawnna ropui tak a ni dawn tih an sawi a ni.

Power & Electricity Department-a Engineer-in-Chief chuan tunhnai khan thuchhuah siamin January, 2026 atang hian Smart Meter vuah tawh Consumer thenkhat te tan Smart Reading (Automatic-a Smart Meter in reading a chhinchiah) hmanga Bill siam tan a ni tawh tih tarlangin, heng Consumer tan hian Billing Cycle/Billing Period siamrem ngei ngei a ngai tih a sawi a. “Hemi insiamrem thla bik hi Billing Period thla khat aia rei te a awm a, chumi a nih avang chuan hemi thla bik hi bill a tam deuh tur a ngaih a ni. A hnu a bill kal leh zel turah erawh Billing Period hi thla khat zel a ni tawh ang. Billing period siamrem hi Smart Meter vuah thar apiangte ah a tahtawlin kalpui a ni ang,” tiin Bill period rei avanga vawikhata bill pek harsate tan Bialtu SDO te remtihna lain Bill Counter-ah installment a pek theih a ni ang tih an tarlang a. Zawhfiah duh nei apiangte tan mahni Sub-Division Office-ah Office hour chhungin zawhfiah theih a nih thu a tarlang bawk.

Tun dinhmunah Mizoram pumah chhungkua, hnathawhna hmun, School, Hall leh Biak In te tiamin Electric consumer 3,08,722 an awm mek nia chhinchhiah a ni a, heng mite hian online in Electric Bill an pe thei vek tawh a, online a pek chu a him bakah a awlsam zawk avangin mipuite chu online in Bill pe vek tura an duh thu P&E Department hotute chuan an sawi a, Bill pek chungchanga harsatna tawkte an chhuichian theih nan PEDM Consumer apps hmangin bill pe thin se an duh thu an sawi bawk a ni.