Sairang thleng Rel a tlan hnuah Mizoram-a Rel hmanga khualzin veivak an pung nasa

Sairang Rel Station hawn anih hnuah phai lama zin chhuak khualzin an tam bakah State pawn atanga khualzin Mizoram tlawhtu an pung nasa hle a. Mizoram tlawhtu an pun nasat vangin anmahni hruaikualtu tur (tour operator) indaihlohna leh mamawhna a sang hle niin Tourism Department chuan an sawi.
Mizoram-a Sairang Rel Station hawn anih hma hian Bairabi atang pawhin Rel hmangin Mizoram atangin State dang hi tlawhpawh theih ni mah se Rel chhuah hun hi a hma avangin Mizoram atanga zin chhuak leh Mizoram tlawhtu khualzin an tam vak lo a, mahse Prime Minister Narendra Modi-a’n Sairang Rel Service a hawn hnuah khualzin an tamin mipuiin Rel an chhawr tangkai hle a. Transport Department chhinchhiah danin September ni 13,2025-a Sairang Rel Station hawn anih hnuah Railway Out Agency, Aizawl chuan ticket an hralh tam tawh hle a, January ni 15,2026 thleng khan ticket hi 24,000 chuang an hralhchhuak tawh a, heta tang hian cheng nuai 150 chuang hmuhchhuah a ni tawh bawk.

Transport Department chhinchhiah danin nikum September thla khan Sairang Rel Station atanga State dang pan tur Ticket an hralhchhuah atangin Rs. 20,95,320/- hmuh a ni a, October, 2025-ah Rs. 56,93,055/- hmuh niin November 2025-ah Rs. 40,74,805/-; December 2025-ah Rs. 22,72,695/- leh January 15, 2026 thleng khan Rs. 9,36,280/- hmuh a ni tawh a. September ni 15,2025 atanga January ni 15, 2026 inkar chhunga Rel Ticket an hralhchhuah tawh zawng zawng chu 24,187 tling tawhin, heta tanga sum an hmuhchhuah tawh zawng zawng chu Rs.1,50,72,155/- a tling tawh bawk a ni. Transport Department-a thawkte an sawi danin Aizawl-a Railway Out Agency atanga Rel Ticket an pekchhuah zingah hian a tam ber, za zela 50 (50%) chuang chu Sairang leh Guwahati inkar Rel Service Ticket la te an ni a, Kolkata Service ticket la in a dawt a, Delhi Service hi chu a la lun lutuk rih loh niin an sawi a. Railway Out Agency, Aizawl hi November ni 14, 1975-ah ding tanin, May ni 22, 1997 atang khan Computerized Ticket booking hawng tanin India ram hmun hrang hranga zin duh tan Rel Ticket an pechhuak thei a ni. 

Mizoram-a Rel service in Sairang a thlen takah chuan kawng tam takah an chhawr tangkai laiin harsatna pawh a thleng ve niin Sairang VCP PC. Lalrindika chuan thuthar thehdarhtute a hrilh a. Rel an tangkaipui dan sawiin, “Sairang leh a chhehvela Home Stay leh Restaurant mai bakah dawr pawh a lun hle a. Hei mai bakah hnam-dang lo thleng thenkhat ILP dil thiam lo te awmin chung mite ILP dilsak chuan thalai tam tak an inhlawh a. Khualzinte vangin lirthei chi hrang hrang Taxi, Maxi Cab, Auto Rickshaw leh Commercial vehicle ten tlanna an hmuh tam phah a ni,” a ti a. Rel chu tangkaipui viau mahse harsatna thleng pawh a awm nia sawi bawkin, “Rel a lo thlenin passenger phurh inchuh kawngah khawtual leh hmun danga lirthei neitute inkarah inhnialna leh buaina neuh neuh te a awm fo thin a. Khualzin an tam avang hian hmeichhia leh tute emaw fel vak lo mikhual chang kan neih fo bakah Rel din hmaa ILP nei lo Rel atanga zuangthla hi an awm thin a, hei hian khawtlang leh Police lam pawh min ti buai ve fo thin a ni,” a ti bawk.

Bairabi–Sairang Rel kawng 51.38 km a thui siam hna hi November 2014 atangin thawh tan a ni a, zawh hun tura ruahman ah zawh hman ni lovin harsatna eng eng emaw a thlen hnuah September ni 13, 2025 khan Prime Minister Narendra Modi chuan Lengpui Airport atangin he Rel kawng hi a hawng a ni. Sairang atang hian Aizawl–Delhi Rajdhani Express, Aizawl–Kolkata Express leh Aizawl–Guwahati Express te tlan tir thin an ni a. Heng bakah hian bungraw phur Rel te pawh tlanin khualzin tam lai, nikum Krismas vuakvet-ah phei chuan Ticket a lunin Rel dang service tur pawh ruahman a ni hial a ni.