Kawng siam mek an tlawh

Aizawl khawpui chhung kawngpui thawm-that hna thawh mêk chu Inrinni zan khan ZPM General Hqrs. hruaitute chuan Vice President C. Lalnunnema hovin an tlawh.

ZPM hruaitu ten kawng siam hna an thawh mekah hian Bungkawn leh Nursery inkar kawng siam mek niin anmahni lo dawngsawngtu PWD Central Circle-a SE, Er. Lalrinngheta chuan tuna hna hi Aizawl kawngpui resurfacing project awm tawha la lian ber a nih thu leh KM 83 thawmthat a nih dawn thu a sawi a, he hna hi kum 2024-25 hmalakna niin, nikum April atang khan Contractor-in a thawk tan a, kum 2025-26 hmalakna in KM 20-30 hna a awm leh mêk bawk tih a sawi.

He hna hi EPC mode a nih thu pawh PWD hotute chuan sawiin, hun duan sa a nih thu leh mipui te pawh ti khawtlai lo tura an duh thu an sawi a. Contractor hian kumin April ni 15 chuan thawh zawh an tum thu sawiin, “Resurfacing satliah a ni lo a, a tha leh to ber chi Bituminous Concrete (BC) hnaa thawh a ni a. 30 mm-a chhah tur niin, 'water proof' a nih sa avangin 'seal coat' a ngai lo. Laih chhiat leh mai mai kan remti lo a, kan ui hle a ni. Kum 3 tal laih chhiat loh ni se kan ti a, Contractor hian maintenance kum 3 mawh a phur tel bawk,” tiin Er. Lalrinngheta chuan an hnathawh chungchang hi a sawi bawk.