Rajya Sabha MP in Mizoram mamawh sawilang

Parliament Budget Session chu Vawiin, January 28, 2026 hian neih tan a ni dawn a, hemi atana inbuatsaihna atana All Parliamentary Floor Leaders Meeting nimin-a neih ah Mizoram Rajya Sabha MP, K. Vanlalvena chuan Mizoram thil pawimawh hrang hrang a tarlang.

Nimin-a thutkhawm ah hian Rajya Sabha MP K. Vanlalvena chuan Sairang Rel Station atanga Mizoram chhim tawp Myanmar ramri thlenga Rel kawng sialna tur zirchianna hmasa, Preliminary Survey zawh a nih tawh thu sawiin, he Rel kawng sialna tur pawisa chu kumin Union Budget-ah hian dah nghal a tul thu a sawi a. A rang thei ang bera he Rel kawng thar hi India ram tan leh Mizoram tan a pawi-mawh tur thu a sawi bawk.

Rajya Sabha MP chuan Sairang thlenga Rel kawng thar hi nikum ah Prime Minister in a hawn thu sawiin, Sairang Rel Station chu Aizawl atanga Lengpui Airport panna kawngpui sira awm a nih avang leh Res Station thar a awm avangin motor kawng a lun thar hle tih a sawi a. Tuna kawngpui awmsa Aizawl leh Sairang inkar motor kawng chu a zau tawk tawh lo tih sawiin, a rang thei ang bera Sairang Rel Station leh Aizawl khawpui inkar chu Four Lane kawnga siam a tul thu sawiin, kumin 2026-27 Union Budget ah dah nghal a tul thu a sawi bawk.