Mizoramin sports chawikan kawnga lawmman dawng

Mizoram chuan Sports chawikan leh tihhmasawn kawnga hma la tha lawmman, ‘Best Upcoming State Promoting Sports and Physical Education’ a dawng.
Nizan hmasa (Jan. 15, 2026) khan New Delhi-a India International Centre-ah ‘Global Sports Education Convention 2026 and National Awards Ceremony’ neih niin India rama Sports leh Physical Education huanga tithate hnenah ‘National Sports and Physical Education Awards’ sem a ni a, Mizoram chuan Sports chawikan leh tihhmasawn kawnga hma la tha lawmman, “Best Upcoming State Promoting Sports and Physical Education’ dawngin Mizoram sawrkar aiawhin Sports & Youth Services Department Joint Secretary H. Dolianbuaia chuan he lawmman hi a dawng a, he hunah hian mithiam sawm bik leh State hrang hrang aiawh te’n India rama Sports leh Physical Education hmasawnna tur an sawiho nghal bawk a ni.

Sawrkar thuchhuah tarla danin Mizoram sawrkar chuan hmathlir mumal tak nei chungin Sports-ah hma a la a. Olympic Games 2036 thlir chunga Mizoram pum dapchhuaka Sports Coaching leh Talent zawnna tur ‘Empowering Mizoram Sports (EMS)’ chu January 14, 2025 khan Chief Minister Lalduhoma’n hawngin EMS hnuaiah hian Mizoram khaw hrang hranga naupang kum 8 leh 15 inkar te chu Olympic Sports discipline thlan-chhuah ah ni 15 (darkar 45) chhung training pek an ni dawn a, Mizote thiam zawng, 2036 Olympic Games-a India ram aiawha an tel theihna tur nia ngaih Sports discipline-te ngaihpawimawh a ni a. Talent nei tha bikte chu Residential training pe in uluk lehzuala enkawl chhunzawm an ni ang.

EMS hi Mizoram khaw kilkhawr ber thlengphak tura duan niin Public Private-Partnership (PPP) Mode-a kalpui tur a ni a. Sawrkarin Coach leh Sports equipment a tum ang a, Coach duh khua/veng te'n Coach-te veivahna, thlenna leh ei leh in an tum ve thung ang. Hei hi khawtlangin neitu nihna rilru an put a, theihtawp an lo chhuah theih nana ruahman a ni a. Coach te hi thingtlang atang pawha online-a awlsam taka dil theih turin ruahman a ni.

EMS kalpui dan hi tihfel a ni mek a, hemi hnuaiah hian December 1 - 5, 2025 chhung khan ‘Trainers Training’ neih a ni a. December 15-18, 2025 chhung khan JICA India nen tangkawpin Sports Coaching-a mithiam bik Prof. Masamitsu Ito, Nippon Sports Science University, Tokyo chuan Hawla Indoor Stadium-ah Coach te training a pe bawk a ni.

Sports-ah a bulthut atanga hmalak tulzia hriain Mizoram State Sports Council leh Samagra Shiksha Mizoram te chuan May 1, 2025 khan 'Grassroots Sports Development Program (GSDP)' a thawhdunna thuthlung (MoU) an ziak bawk a ni.