Kum 2025 chhungin Mizoram-ah kangmei chhuak vanga In leh bungrua kangchhia a tam

Nikum 2025 chhung khan Mizoram-ah kangmei chhuak vangin Rs. 46,08,84,530 hu In leh lo leh bungrua a kang chhia.

Fire Department hotute sawi danin nikum 2025 chhung khan Mizoram hmun hrang hrangah chenna In kang 31 leh ramkang 164 a awm a, kangmei vangin mi pakhat a thih bakah hliam tuar mi pakhat a awm bawk a, chenna In leh ram bakah hian bawlhhlawh paihna, lirthei leh thil dang kang report 54 an dawng bawk a, nikum-a kangmei chhuakin thil a tihchhiat hlut zawng hi Rs. 46,08,84,530 hu a ni. Nikum chhung khan March thla chu kangmei chhuah tam ber thla niin chenna In kang 6 leh ramkang 92 a awm a, mi pakhat in nunna a chan bawk a, March thla chhunga kangmei chhuakin a tihchhiat hlut zawng chu Rs. 3,00,62,330 hu a ni a, June thla ah chenna In leh ramkang report a awm lo thung a ni.

Kumin January thla kal mekah kangmei chhuak vangin cheng nuai 42 hu In leh lo leh bungrua a kangchhe tawh bawk a, kumin January ni 1 atanga ni 23 thleng khan Mizoram-ah chenna In kang 2 awmin ramkang 2, Bawlhhlawh paihna kang pakhat, lirthei kang pakhat leh Transformer/Distributor Box kang vawi hnih a thleng tawh tih Fire Department hotute chuan an sawi a. Khua a Thal chhoh leh tak avangin hmun hrang hrangah kangmei chhuah thu hriat tur a awm chho leh ta zeuh zeuh tih sawiin, Kangmei chhuah chhan tam ber chu fimkhur tawk loh vang a ni tih an sawi a, mitin te kangmei laka In leh a vel a him theih nan fimkhur theuh turin an chah bawk.