Serchhip Auditorium velah lei a che leh niin hria

Serchhip Field Veng-a Serchhip Auditorium thuthmun lei chu tunhnaiah a che leh nia hriat a ni a, hetihlai hian Serchhip Auditorium thiat tur hian hmalakna a kal mek nia thudawn a ni bawk.
Serchhip Field Veng-a Auditorium hi tunhnai khan a che leh nia hriat a ni a, hemi chungchang hi helai Veng-a cheng te chuan Sub-Hqrs. YMA Serchhip hruaitute hnenah thlenin nimin khan Sub-Hqrs. YMA Serchhip hruaitute chuan a hmun ah tlawhin an enfiah a, tunhma deuha lei chet vang a Building leh a chhehvel lei te a che tawh te chu a che leh ngei nia an hriat thu an sawi a, a bik takin Auditorium hmalam, Ramthlun Veng kawng chung lam chu a che leh nia an hriat thu an sawi a, hemi chung-chang hi Serchhip Bawrhsap hnenah pawh an thlen nghal bawk a ni.

Serchhip Bawrhsap chuan Auditorium thiat tur hian hmalakna kalpui mek a nih thu YMA hruaitute hnenah hian a sawi a, tunah hian sum te pawh ruahman niin UD&PA Department aiawh te pawh a hmuna enfiah turin Aizawl atangin an rawn kal dawn nia thudawn a ni bawk.

Serchhip Auditorium hi tun dinhmunah chuan mipui tana hman tlak a ni meuh tawh lo a, a building leh a chhung cheina te chu a chhe nasa tawh hle nia thudawn a ni.