Mizorama ruihhlo dona kalpui dan thlirletna leh kalpui chhunzawm dan tur sawihona neih a ni

Mizorama ruihhlo dona kalpui dan thlirletna hun leh kalpui chhunzawm dan tur sawihona chu Inrinni khan Chief Minister Lalduhoma hovin neih a ni a, he hunaah hian Chief Minister chuan ruihhlo chu hnam hmelma lian ber a nih angin a do kawngah pawh Sawrkar leh khawtlang tanrual a pawimawh thu a sawi a ni.

Chief Minister Office-a ruihhlo dona kalpui dan thlirletna leh kalpui chhunzawm dan tur sawihona ah hian Chief Minister Lalduhoma chuan ruihhlo do kawnga chak zawka hmalak a nih theih nan Mizoram sawrkar chuan December 2024 khan Saitual, Khawzawl leh Hnahthial-ah Excise & Narcotics Station a hawn thu te, Rel luhna Sairang leh Bairabi-ah Excise Station hawn phalna peihfel a nih bakah March ni 14, 2025 khan Excise & Narcotics Department-a thawktute chetvelna tur lirthei 18 lei a nih bakah indaihlohna zualpui phuhruk nan Mizoram Sawrkar atangin LMV pathum ruahman a nih thu a tarlang a. Excise & Narcotics Department-a thawktute indaihna phuhruk nan Post 16 siam thar a nih thu sawiin, Direct Recruitment hmangin mi 28 lak an nih tawh bakah mi 39 la leh turin inbuatsaihna a kal mek thu a sawi a. Kum 2025 chhung khan ruihtheih thil chi hrang hrang kaihhnawih ah thubuai 319 ziahluh a nih thu a sawi bawk.

Chief Minister Lalduhoma chuan ruihhlo chu hnam hmelma lian ber a nih angin a do kawngah pawh Sawrkar leh khawtlang tanrual a pawimawh thu sawi bawkin, Mizoram-a ruihhlo lolut te dan chah a nih theih nan Home Department, Excise & Narcotics Department leh Central YMA-te tangkawp hmalakna in September ni 1, 2025 khan ramri hrul khaw 22-ah Operation Jerico kalpui a nih thu a sawi a. September ni 1, 2025 leh January ni 13, 2026 chhunga ruihhlo man tawh zat hlut zawng chu cheng vbc. 196.42 a nih thu a sawi bawk.

He thutkhawm ah hian Home Minister K. Sapdanga chuan ruihhlo do kawnga Excise & Narcotics Department tha tichak tura Home Department bakah Central YMA tha thawhna chuan awmzia a neih thui hle thu a sawi a. Aizawl mai bakah District hrang hranga ruihhlo tih remna tura Sawrkar an thawhpui thinna ah lawmthu a sawi bawk.

Excise & Narcotics Department leh Tourism Department changtu Minister Lalnghinglova Hmar pawhin inbiakpawhna leh inkalpawhna kawnga hmasawnna avangin Mizoram chuan zinmi tam zawk a hip mek zel thu a sawi a. Aizawl hmun laili lai leh a chhevela ruihhlo ngai, hmuh nuam lo tak tak awm thin te chuan zinmite rilru ah Mizoram hmel a tih balh phah theih thu a tarlang a. Ruihhlo do remna kawngah leh ruihhlo ngaite enkawlna kawngah Excise & Narcotics Department chuan Sawrkar Department dangte, YMA leh khawtlang thawhpuina a mamawh takzet thu a sawi bawk.

He hunah hian Central YMA General Secretary Prof. Malsawmliana tarlan danin December ni 10, 2025 khan YMA chuan Kumpuan hawnna hun hmangin Police-te nen tangrualin, December ni 10, 2025 leh January ni 12, 2026 chhung khan ruihhlo ngai, khawlaia tei rawlai mi 192 khawm niin Home-ah mi 85 dah luh an ni a. Central YMA hnuaiah January ni 20, 2026 khan Central Anti Drugs Squad (CADS) 24 din a ni a, hengte hian Aizawl khaw chhung Zone 10-a thente chu an vil thin dawn bawk a ni.

Tun tum thutkhawmah hian ruihhlo lo lut tur dona kawnga hmalakna leh ruihhlo dona kawnga hmalakna hrang hrangte thlirho a nih bakah ruihhlo ngaite enkawl a eizawnna tlak thiamna an neih theihna tura Home awmsa thenkhat thawmthat dan turte sawiho a ni a. Hei bakah hian ramri hrul, ruihhlo luh tamna hmun a ngaih ah te Out-Post siam belh dan tur rel a ni bawk a. Ruihhlo dona kawnga thawk sawrkar Department leh tlawmngai pawl aiawhte an tel a ni.