LADC sawrkar din dawn vangin Total Bandh thulh

Lai Autonomous District Council (LADC)-ah sawrkar a pian mai theih loh avanga tukin dar 5:00 atanga Central Young Lai Association (CYLA)-in Lawngtlai District-a tiamchin awm lova pawnchhuah khap (Total Bandh) huaihawt an tum chu thulh a ni.

LADC-ah sawrkarna siamthei an awm reng laia sawrkar a piang mai thei lo chu hriatthiam har an tih thu Central YLA chuan sawiin, January 22-a Central Executive Committee thukhawm chuan January 24 tlai dar 4:00 thleng ngaichanga sawrkar a piang lo a nih chuan na zawka thuneitute nawr nise an tih angin Inrinni, January 24 zan-a Central YLA Executive Committee thukhawm chuan tukin dar 5:00 atangin tiamchin awm lovin Lawngtlai District-ah Total Bandh kalpui nise an ti a. Amaherawh chu, nimin tlai khan District Council & Minority Affairs Department in hriattirna a chhuah leh tak avangin Total Bandh huaihawt an tum chu an thulh leh chawpchilh ta a ni.

Lai Autonomous District Council (LADC) a sawrkar siam theih nan Larsap-in thupek a chhuah angin District Council & Minority Affairs chuan nimin tlai khan hriattirna tichhuakin United Legislature Party hruaitu C. Lalsawmzuala chu LADC-a Chief Executive Member (CEM) atan January ni 22 atanga ruat a nih thu a tarlang a. January ni 28-ah Protem Chairman kaihhruaina hnuaiah Chairman thlan a ni anga, a tuk January ni 29-ah C. Lalsawmzuala hian thlawptu a ngah leh ngah loh fiahna a hmachhawn dawn a ni. Larsap thu angin nimin tlai vek khan Protem Chairman atana C. Hrangthianga a ruatna tihchhuah a ni bawk a. LADC inkhawm tan hma ni, Thawhlehni hian chawhnu dar 3:00 thleng Chairman chuh turte tan hming pekluhna hun hawn a ni ang a, a tuk chawhma dar 10:30-ah Chairman thlanna neih a ni dawn a ni.

United Legislature Party-ah hian MNF MDC 8 leh Congress MDC 7, an vaiin Member 15 an awm a. January ni 9 khan Larsap hnenah LADC-a sawrkar an siam theih thu an lo thlen tawh a ni.