Report peihfel thawkhat tawh

Mizo Language Development Board hnuaia din Eight Schedules Study Group chuan an Report chu thehluh theihin an peihfel thawkhat tawh.

Mizo Language Development Board hnuaia din Eight Schedules Study Group te hi Ningani kalta khan Chief Minister Lalduhoma chuan a Pisa-ah kawmin an hmalakna te a thlirpui a, hun reilote chhunga hmalakna tha tak an lo kalpui avanga lawmthu hrilhin, a umzui zel dan tur an rawtnate pawh tha a tih thu hrilhin, bawhzui a nih tur thu a lo hrilh bawk a ni.

Eight Schedules Study Group te hian Mizoram-a pawl leh hnam pual hrang hrangte kawm kualin Eight Schedules-a Mizo tawng thun chungchanga an ngaihdante a zawt kual a. An kawm tawh zawng zawngten Eight Schedules-a Mizo tawng dah hi tha an ti tlang hle niin an sawi a, Mizoram hian tunhmain dilna a lo thehlut tawh tih tarlangin, umzuina engmah a awm lo thung a. Study Group te hian Task Group dina, dilna hi a thara thehluh a, chak taka bawhzui thaa an ngaih thu an thlen a ni.

Mizo tawng hi kum 1974 kha State Official Language a puan a ni tawh a, khawvel ram hrang hranga awm Zo hnahthlak zawng zawngte inbiakpawhna a ni a, Sahitya Academy chuan Regional Language-ah a pawm a, zirna lamah PhD thlenga zir theih a ni. Peoples Linguistic Survey of India chuan Mizo tawng chu tawng thang chho mek a nih thu a sawi a, UNESCO chuan khawvela tawng him a thliarhran zingah a him ber dawttu 'Vulnerable' huangah a dah a, Census hnuhnung ber 2011 data-in a tarlan danin India ram State 26-ah leh UT 7-ah Mizo tawng hmang an cheng a, chhiarpui tharah chuan State zawng zawng a huam tawh ngei rin a ni.

Google translate chuan kum 2022 May ni 11 atang khan Mizo tawng chu tawng danga lehlin theihin a dah tan a ni.