AR rama LSC nei mi 13 in sawrkarah an pe lut tawh

Aizawl khawpuia Assam Rifles luah thin ramah mi 113 in LSC an nei a, an zinga mi 13 in an LSC sawrkarah an pe lut tawh.

Land Revenue & Settlement Department in RTI zawhna a chhanna atanga a lan danin Assam Rifles in Aizawl khawpui chhung hmun 8 (pariat) an chhuahsan a. Assam Rifles in an chhuahsan hmunte leh a area chu: Main Barrack (Lammual) - 112004.822 sqm; A.R. School - 4081.338 Sqm; Quarter Guard Hill - 61401.276 Sqm; Church Area - 2549.815 Sqm; War Memorial - 3156.548 Sqm; Loch House - 7336.817 Sqm; Chite - 254142.808 Sqm leh Mcdonald Hill - 1833.955 Sqm te an ni a. Aizawl khawpui chhunga Assam Rifles in chhuahsan loh tur hmun 2 awmin chungte chu 23 Sector Hqs, Khatla leh DIG Residence, Tuikhuahtlang te an ni.

Tuna Assam Rifles te insawnna Zokhawsang zau zawng chu 523.955 Ha a ni a, Zokhawsang-ah hian Assam Rifles te hi Land Lease pek hmangin an awm tih a sawi bawk a. Sipai chhuahsan ram-a LSC nei te chu sawrkar chuan an LSC te sawrkar-a pelet tur hian ngenna a lo siam fo tawh a ni.