Mizoram-a zirna kalphung thlak danglam te Education Minister in a puangchhuak

School Education Minister Dr. Vanlalthlana chuan Mizoram-a School kai hun- Academic Calendar thlak a nih tur thu sawiin, Class X leh XII Exam Resul bu-ah zirlai titha zualte (Top 10) leh zirlai pass-te Division leh Letter mark hmuh dan tihlan a ni tawh dawn lo.

Nimin-a a Pisa-a thuthar thehdarhtute a kawmna ah Education Minister Dr. Vanlalthlana chuan Mizoram zirna in hma a sawn theih nan leh zirlaite leh nu leh pa te tana tha zawk tura hma lak dan tur an chhawpchhuah te tarlangin, 14th Mizoram Educaion Reforms Committee-in zirna leh zirlaite tana tha zawka tur thil tam tak a ngaihtuah thu leh Mizoram zirna in hma a sawn theih nan leh zirlaite nu leh pate tana tha zawka tura hmalak dan tur an chhawpchhuak tih a sawi a, Mizoram zirna in hma a sawn zel theihna atan theihtawp an chhuah zel dawn thu a sawi bawk.

Education Minister chuan Class I-X Academic Calendar chu January - December hmanga siam a ni tawh dawn tih sawiin, Class X exam erawh tuna kan neih hun angah hian chhunzawm tur niin Academic Calendar thar hi kum 2027-2028 atanga hman tan a ni dawn tih a sawi a. Class XI leh XII atan April - March hman chhunzawm tur niin Academy Session atana inrawnkhawmnaah ngaihdan lut 231 atangin 213 in January - December an duh a, zirtirtu pawlte pawhin tha an tih thu leh uluk taka ngaihtuah zuiin Fur laia zirlaite'n chawlh tam zawk an neih theih phahnate a nih beisei a nih vangin January - December ni tura thutlukna siam a ni tih a sawi.

Class X leh XII Exam Resul bu-ah zirlai titha zualte (Top 10) leh zirlai pass-te Division leh Letter hmuh dan tihlan a ni tawh dawn lo tih sawiin, Result bu-ah sikul hming hnuaiah zirlai pass-te hming leh Roll Number chiah tarlan a ni tawh dawn tih a sawi a. He kalphung hi CBSE, CISCE leh State tam takin an kalpui tawh a ni tih a sawi a, zirlaite mark hmuh dan kimchang chu MBSE website atangin a la hmuh theih vek dawn thu leh Merit List leh Rank Certifcate chu MBSE-in a diltute hnenah a pechhuak thei reng ang tih a sawi a. Hei hi zirlaite leh School thiamna tak tak lama inel lova Top Ten-a lan ringawta an inelna tihbona atan te, zirlaite'n an theihna sang ber phochhuak tura midang ni lova anmahni leh mahni an inelna atan te, by-heart system ringawt loa thiamna tak tak neih an tumna atan te leh Class X-a tih that luat duh vanga Class IX zirlai zirtir lo thinin zirlaite-ah thiamna tak tak a tuh loh thin tihbona atan te a ruahman a nih thu a sawi bawk.

English Medium School-ah In lama an tawng (Home language) hman thlauhthlaa saptawng an hman nasat lutuk tawh avangin Mizoram-a kan tawng humhalh a nih theihna atan English Medium School-ah Home Language Day hman tura hriattirna siam a ni dawn tih pawh sawiin, Class period kar laka chawlh awmah zirlaite'n In lama an tawng inthlahrung hauh loin an hmang tura tih a ni ang tih a sawi a. Mizorama chengten Hindi kan thiam loh em avangin State pawn kan kalin harsatna kan tawk thin tih pawh Minister chuan sawiin, “School zawng zawngah thla khatah ni khat Hindi Speaking Day hmang turin thuchhuah siam a ni dawn. Hindi tawng hi class chawlh lai (breaks)-a hman tur a ni ang,” a ti a. Hindi zirtirtu Hindi tawng hmang mumal hlei thei lo phei chu a hrana training kal tura tih an ni ang tih a sawi bawk.

Sawkar hmasain Common Uniform hmanga zirna a kalpui chu chhunzawm a ni tawh dawn lo tih sawiin, Uniform chungchang chu School kuta dah a nih tawh dawn thu leh Commion uniform rawng hmang chhunzawm duh an awm pawhin School thuneihna a ni ang tih a sawi bawk a. School tan hun chungchang ngun taka ngaihtuah a nih hnuah leh inrawnkhawmnaa pawl leh mimal tam zawkin an duh dan angin dar 9:00-ah chhunzawm a ni ang tih a sawi bawk.