District a Settlement Officer in thuneihna a neih ang SDO (Civil) ten an huamchhungah an nei dawn

Land Revenue & Settlement Department changtu Minister B. Lalchhanzova chuan District a Settlement Officer in thuneihna a neih ang zawng zawng chu SDO (Civil) in ama huamchhung ah a nei ve dawn tih sawiin, “Vairengte leh Thenzawl-ah bultanin Mizoram puma Civil Sub-Division zawng zawngah kalpui vek a ni dawn a ni,” a ti.
Revenue thuneihna kenkawh kawnga SDO (Civil) tha tihchak dan tur ngaihtuahin kar kalta Zirtawpni khan Revenue Minister B. Lalchhanzova hian Thenzawl-a SDO (Civil) Office chu tlawhin he thu hi a sawi a, Revenue kalphung siamthatna kawngah Deputy Commissioner atangin bul an tan tih sawiin, “DC Administration zawng zawng kan rawn ti Revenue a, mipui leh sawrkar tana hmasawnna duhawm tak Administrative Reform kan thlen thei hi ka lawm hle a ni,” a ti a. District-a Settlement Officer in thuneihna a neih ang zawng zawng kha SDO (Civil) hian ama huamchhungah a nei ve dawn tak thu leh mipui harsatna tawh thin tam tak a sukiang dawn tih a sawi a, “SDO (Civil) Thenzawl chuan Sub-Registrar Office mawhphurhna a neih belh tawh dawn a, Vairengte leh Thenzawl-ah bultanin Mizoram puma Civil Sub-Division zawng zawngah kalpui vek a ni dawn a ni,” a ti.

Revenue Department siam tha tura tan an lak dan sawiin Minister B. Lalchhanzova chuan, “Tun dinhmunah engemawchen danglamna thleng tawh mah se fel lo lai leh siam that ngai a la tam hle a; Staff indaihlohna te, inrelbawlna leh hnathawh dan phung siamthat leh chinfel ngai a la tam,” a ti a. An sawrkar kum chanve chhunga Revenue leh Supply Department hnuaia an hmalakna te a bu-a siam a nih tur thu a sawi bawk.

He hunah hian Minister tawiawmtu Revenue Secretary Vanlalmawia chuan Revenue Administration tichak tura an hmalakna sawiin, DC Office a bul an tan thu leh DC chu District Revenue Administration-ah thuneihna sang zawk pek a nih thu a sawi a. Anmahni Sub-Division huamchhungah SDO (Civil) te pawh Assistant Commissioner (Revenue) tia designate an nih thu sawiin, District Hqrs. a kal kher ngai lovin Stamp & Registration-ah te, Revenue Court leh Land Survey and Settlement-ah anmahni bial chhungah Revenue thuneihna an nei tawh dawn a ni, a ti.

Revenue Department Director R. Lalthazuala chuan an hmalak dan tur leh ruahmanna an siam dan te a sawifiah bawk a. SDO (Civil) Thenzawl-ah bul tanin SDO (Civil) Office chu Revenue Office leh Sub-Registrar Office tak tak anga thawk turin Office building leh thawktute Quarters tihlen leh sak belh a ni dawn a, Staff te pawh dah belh an ni dawn a, Land Records te pawh Serchhip atangin Thenzawl-ah sawn a ni dawn tih a sawi bawk.

Revenue Minister B. Lalchhanzova hian Zirtawpni vek khan Bawrhsap Paul L. Khuma kaihhruaina hnuaiah Thenzawl khawtlang hruaitute, tlawmngai pawl hruaitute leh mipuite chu Thenzawl Golf Course-ah a kawm ghal bawk a ni.